"Çox şadam ki, "Şəki'də oynayıram. Ötən tur sabiq komandam "Gəncə"yə qarşı matçda debüt etdim. Mən də bu komandaya əlimdən gələn köməyi göstərmək istəyirəm. Hərçənd, debütüm uğurlu alınmadı".

Prosport.Az xəbər verir ki, bu sözləri "Şəki"nin basketbolçusu Tariel Yusifzadə klubun mətbuat xidmətinə açıqlamasında deyib.

Gənc millimizin üzvü olan oyunçu bildirib ki, "Gəncə"yə məğlubiyyətdə onun da təqsiri var: "Rəqibin 24 nömrəli oyuncusunun 2 dəfə 3 xallıq atışına mane ola bilmədim. Amma ümumilikdə komanda kimi Gəncədə yaxşı müdafiə olunduq, yaxşı hücumlar qurduq. Həftə içi həmin məğlubiyyətimizdəki səhvləri gördük. "Lənkəran"la oyunda daha ağıllı basketbol oynayacağıq"

O, Gəncə İdman Sarayında şəkillərini görməyə şad olduğunu söyləyib: "Çünki ötən mövsüm "Gəncə" komandasında indiki baş məşqçi Bedri Meriçin rəhbərliyi altında çıxış etmişəm. Mövsümü 9-cu yerdə başa vurmağımıza baxmayaraq, Gəncədə oynamaq insana zövq verirdi".