“Heyətlə bağlı problemlərimiz var idi. Cəmi 8 basketbolçu ilə oynasaq da, yerli oyunçularımız rəqibin legionerləri ilə bərabər səviyyədə mübarizə apardı. Bugünkü qələbədə yerli basketbolçuların əməyi böyük idi".

Prosport.Az xəbər verir ki, bu sözləri "Sabah"ın baş məşqçisi Rimas Kurtinaytis Azərbaycan Basketbol Liqasında "Naxçıvan"a 75:74 hesabı ilə qalib gəldikləri oyundan sonra deyib.

Mütəxəssis rotasiyaya görə sürətli hücumlar təşkil etməkdə çətinlik çəkdiklərini bildirib: "Bu səbəbdən fərqli oyun üslubunda çıxış etdik. Daha çox akademik, klassik basketbola üstünlük verdik. Başqa sözlə, rəqibin hücumlarını nəzarətdə saxladıq. Rəqibin sürətli hücumlarının qarşısını alıb mövqe oyunu oynamağa çalışdıq. Düşünürəm ki, rəqibi təklif etdiyimiz basketbolu oynamağa məcbur edə bildik. İdman xoşbəxtliyi də tərəfimizdə idi. Rəqib baş məşqçini gözəl oyuna görə təbrik edirəm.

O, aparıcı legionerlər – Hassani Qravett və Trevon Duvalın oynamamasına da toxunub: "Bildiyiniz kimi, hər ikisi avrokuboklarda hər oyunda minimum 38 dəqiqə oynadı. Bu isə təbii ki, əzələlərin həddən artıq yüklənməsinə səbəb olur. Trevonun zədəsi var. Hassaninin isə NTD ilə oyundan sonra ağrıları var idi”.