"1-ci və 2-ci periodda oyuna yaxşı daxil ola bilmədik. Amma son periodlarda oyunçularımın göstərdiyi performansa görə onlara minnətdaram. Böyük fasilədə onlarla danışdım və görüşə yenidən ortaq oldular".

Prosport.Az-ın xəbərinə görə, bunu “Naxçıvan” basketbol komandasının baş məşqçisi Murat Dikmən deyib.

O bu gün “Sabah” BK-na 74:75 hesabı ilə uduzduğu oyundan sonra klubun mətbuat xidmətinə açıqlama verib: "Matçı qazanmaq nöqtəsinə gətirmişdik. Hesab 70:67 olan zaman 3 hücumumuz oldu, amma heç birindən istifadə edə bilmədik. Rəqib isə atış etdi. Son hücum da bizdəydi. Atışımızı da etdik. 3 dəfə atış etdik. Lakin alınmadı, şanssızlıq yaşadıq. Amma biz göstərdik ki, yaxşı komandayıq. Ötən mövsüm də 2 dəfə final oynamışdıq. Bu mövsüm də final oynayacağıq. Buna çox inanıram. Cermeyn Marou və Nəzər Quliyev zədəli idi. Fədakarlıq edib oynadılar. Onlara da təşəkkür edirəm. Qarşıda "Neftçi" ilə oyunumuz var. Bu oyunu siyahıya məğlubiyyət kimi yazmırıq. Yaxşı basketbol oynadıq. "Neftçi" ilə oyuna konsentrasiya olacağıq. Həmin oyunda da qələbə qazanaraq, yolumuza davam edəcəyik".