"Abşeron" Azərbaycan Basketbol Liqasında "Neftçi" üzərində 72:56 qalib gəlib.

Prosport.Az hər iki komandanın baş məşqçisinin fikirlərini təqdim edir:

Ərhan Tokər ("Abşeron"): "Normalda hər zaman ilk periodları yaxşı oynayırıq. Bu dəfə də belə oldu. Bundan öncəki matçlardan fərqli olaraq, fasilədən sonrakı dövrələri də yaxşı oynaya bildik. Müdafiədə inamlı idik və bu da öz növbəsində hücumdakı keyfiyyətimizə müsbət təsir etdi. Daha öncə məğlub olduğumuz matçlarda da belə oyun nümayiş etdirə bilsəydik, son hissələrdə qalib gələ bilərdik. Bu matça çox yaxşı hazırlaşmışdıq. Gözəl qələbə oldu. Bu qalibiyyətə görə həm oyunçularım, həm də mən çox sevincliyik.

6 komandanın arasında 5 kollektiv güc nisbətində bir-birinə yaxın sayıla bilər. Yalnız "Sabah" oyunçu keyfiyyəti və göstərdikləri oyuna görə kəskin fərqlənir. Digər komandalar isə istənilən matçda qələbə qazana bilər. "Neftçi" bu dövrəni pis keçiribsə, növbəti dövrədə məğlub olduqları komandaları üstələyə bilər. "Sərhədçi" gözəl oyun nümayiş etdirir. "Naxçıvan"ı da bu siyahıya əlavə etmək lazımdır. Oyunlar sürətli və gərgin keçir. Bu baxımdan deyərdim ki, liqanın səviyyəsi ötən illə müqayisədə daha da artır".

Ümid Nicat ("Neftçi"): "Bizim üçün çox vacib oyun idi. Komanda ilk hissədə normal oynadı, 3-cü periodda mudafiədə və hücumda səhvlərimiz cox oldu. 23 top itkisi baş verdi. Təbii ki, bu da məğlubiyyətə apardı. Çalışmağa davam edəcəyik. Ümid edirəm ki, növbəti oyunda yaxşı nəticə göstərəcəyik".