"Quba" Azərbaycan Basketbol Liqasında Bakıda "Ordu"ya 101:75 qalib gəlməklə sürpriz nəticəyə imza atıb.

Prosport.Az bu oyunla bağlı hər iki komandanın baş məşqçisinin fikirlərini təqdim edir:

Şəhriyar Əsgərov ("Quba"): "Komandamız çox yaxşı basketbol oynadı. Əsasən də müdafiə planında yaxşı idik. Rəqibin qarşısını ala bildik. "Ordu" da yaxşı komandadır. Onlara qarşı yaxşı hazırlaşmışdıq. Bilirsiniz, ilk turlardakı məğlubiyyətlərimizə səbəb vaxtsızlıq idi. İndi zaman keçdikcə oyunçular bir-birini yaxşı başa düşür, adaptasiya keçib, oyunumuz alınır. Fasilə zamanı komanda daha da yaxşı işlədi, müəyyən kombinasiyalar üzərində işləmişdik. Onları da meydanda tətbiq etməyə çalışdıq. Qələbə bizi çox sevindirdi. Qarşıdakı turda rəqibimiz "Şəki"dir. Evdəki ilk oyunumuzda qalib gəlmişik. Bu dəfə də qələbə qazanmaq niyyətindədyik. Təbii ki, asan olmayacaq. Çünki "Şəki" də yaxşı komandadır. Çalışacağıq ki, həmin oyunda qələbə qazanaq. Hələ ki vaxtımız var, işləyəcəyik, hazırlaşacağıq. Görək də, 1 basketbolçu da gətirə bilərik. Zaman hər şeyi göstərəcək. Biz ən yaxşısı üçün çalışırıq".

Alberto Blanko (“Ordu"): “Öncə “Quba” komandasını təbrik edirəm. Onlar çox yaxşı oynadı. Bütün komponentlərdə bizdən üstün idilər. Həm müdafiədə yaxşı oynadılar, həm də hücumda istədiklərini həyata keçirdilər. Komandama gəlincə, həm təkbətək mübarizələrdə, həm müdafiədə, həm də hücumların sonluğunda çox pis təsir bağışladıq. Oyunumuz alınmadı. İlk 2 periodda bərabər mübarizə getsə də, sonrakı hissələrdə bərbad oynadıq. 3-cü periodda 22 xal fərqi ilə uduzduq ki, bu fərqi aradan qaldırmaq mümkün deyildi. Bir sözlə, çox pis oynadıq. Artıq bu nəticəni yaddan çıxarmalı və gələcək oyunlara köklənməliyik. Səhvlərimizdən nəticə çıxarmalıyıq”.