"Murov Azterminal" kişi voleybol klubu heyətini gücləndirməkdə davam edir.

Prosport.Az-ın xəbərinə görə, Bakı klubu Rusiyadan 3 oyunçu transfer edib. Bunlar Nikita Alekseyev, Aleksey Samoylenko və Vladislav Jlobadır. 

Diaqonal oyunçu ampluasında çıxış edən Nikita Alekseyev "Qazprom-Yuqra"dan gəlib. 32 yaşlı voleybolçu 2018-ci ildə Kazan "Zenit"i ilə Çempionlar Liqasının və klublararası dünya çempionatının qalibi olub. 2011-ci ildə isə U-21-lər arasında dünya çempionluğunu qazanıb. Rusiya Superliqasının, ikiqat Rusiya Kuboku və ikiqat Rusiya Superkubokunun qalibi olan voleybolçu ilk dəfə legioner karyerasını məhz Azərbaycanda keçirəcək.

Aleksey Samoylenko da Alekseyev kimi, Tatarıstan klubu ilə 2018-ci ildə Çempionlar Liqasının və klublarası dünya çempionatının qalibi adını qazanıb. Blokçu ampluasında oynayan voleybolçu 2019-cu ildə Rusiya millisi ilə Millətlər Liqasının qalibi olub. O həmçinin, ikiqat Rusiya çempionu, dördqat Rusiya Kuboku, dördqat Rusiya Superkubokunun qalibidir. Ötən mövsüm PAOK-la Yunanıstan Superkubokunu qazanmış 39 yaşlı voleybolçunun son klubu Rusiyada "Dinskaya" olub. O, dünya reytinqində 373-cü (ümumilikdə bu il üçün 285-cidir) idmançıdır ki, bu da Azərbaycan çempionatında oynayan Top-500 voleybolçu sırasında olması deməkdir.

42 yaşlı Vladislav Jloba da ilk dəfə legioner karyerasını "Murov Azterminal"da keçirəcək. Onun son klubu Rusiyada "Apsnı" komandası olub. Jloba toppaylayıcı mövqesində çıxış edir.

Qeyd edək ki, cari mövsüm Azərbaycan Kubokunda 3-cü olmuş "Murov Azterminal" həmçinin, Mehdi Ablu, Sina Əsgərpur, Möhsün Vazehi (hər üçü İran) və Sepe Baytens (Belçika) adlı voleybolçuları da transfer edib. Son olaraq Çində oynamış kubalı Xose Antonio Sandoval Roxas isə transfer edilsə də, müəyyən səbəblərdən geri qaytarılacaq.

Səbuhi Musa