“Naxçıvan” komandası Azərbaycan Basketbol Liqasının IV turunun açılış oyununda "Abşeron"a 72:68 qalib gəlib.
Prosport.Az xəbər verir ki, oyundan sonra hər iki komandanın türkiyəli baş məşqçisi fikirlərini bildirib:
Murat Dikmən (“Naxçıvan”): "İlk olaraq “Abşeron” kollektivini təbrik edirəm, çox yaxşı komanda formalaşdırıblar. Yaxşı mübarizə aparırlar. Əslində böyük fasilədən öncə artıq öz oyunumuzu göstərməyə başladıq. 2-ci periodda fərqi bir qədər azaltdıq. Böyük fasilədə basketbolçularıma oyun planını dəyişdirməli olduğumuzu bildirdim. Çünki rəqibimiz bizi yaxşı analiz etmiş və ona uyğun hazırlaşmışdı. Biz də ona görə matç planını dəyişdirdik. Müdafiədə inamlı oyunun bizə qalibiyyət gətirəcəyini düşünürdük. Həqiqətən 3-cü və 4-cü periodda müdafiədə yaxşı oyun sərgilədik. Son periodda rəqibi 8 xalda saxlamaq bizim üçün çox vacib idi. Qarşılaşmanın sonunu da çox yaxşı oynadıq. 3-cü periodda əslində rəqibi yaxalamışdıq, lakin orada kiçik səhvlər etdik və yenidən 11 xallıq fərq yarandı. İlk periodda fərq çox idi. Bu cür geridönüşlər etmək çox asan deyil. Həm mənəvi, həm də fiziki vəziyyətinizi çox aşağıya endirir. Bu cür reaksiya göstərdiyi üçün komandama "çox sağ ol" deyirəm. Hələ mövsümün əvvəlindəyik və məğlubiyyətsiz davam edirik. Növbəti həftə “Sabah” BK ilə liderlik matçına çıxacağıq. O görüşdə də belə çıxış etsək, istədiyimizi əldə edə bilmərik. Bu qarşılaşmadan lazımı dərsləri çıxarıb önümüzə baxmalıyıq".
Ərhan Tokər ("Abşeron"): "İlk olaraq onu deyim ki, oyunumuzu inkişaf etdirmişik. İlk dövrələrdə bunu sübut etdik. Yaxşı oyun sərgilədik. 2-ci hissədə isə əvvəlki günlərimizdəki kimi oynamağa başladıq. Yəni, rəqib bir qədər sərt oyuna keçid edən kimi və hakimlər də buna imkan verən kimi biz öz oyunumuzu itirdik. Rəqibin bəzi özəllikləri var idi ki, biz bunu bilirdik. Bu istiqamətdə hazırlaşsaq da, oyun ərzində bunları sanki unutduq. Bir sözlə, bizim üçün bu, çox acı məğlubiyyət idi. Qalib gəlməli oyunu uduzduq. Bu bir az da legioner oyunçularımızın bəzilərinin çox təcrübəli olmaması ilə əlaqəlidir. Bu isə biz məşqçilərin işidir. Onları inkişaf etdirmək və lazımı səviyyəyə çatdırmalıyıq. Rəqibi qələbə münasibəti ilə təbrik edirəm".