“Bizim üçün həyəcanlı zamandır. Yarışda mübarizəni davam etdirmək üçün hər 2 ev oyununda qalib gəlməliyik”.

Prosport.Az xəbər verir ki, bunu İrlandiyanın kişilərdən ibarət basketbol millisinin kapitanı Şon Flud deyib.

28 yaşlı basketbolçu DÇ-2027-nin I seçmə mərhələsində yığmamıza qarşı oynayacaqları matçı dəyərləndirib. O bildirib ki, qrupda 2 məğlubiyyətdən sonra son şanslarından maksimum istifadə etməyə çalışacaqlar:

"Ya elə indi, ya da heç vaxt. Bilirik ki, Azərbaycan millisinin amerikalısı Cordan Deyvis çox istedadlıdır. O, İspaniyanın yüksək liqasında oynayır və Avropada olduqca uğurlu bir karyera qurub. Onlar bir neçə yerli istedadlı oyunçuya sahibdir. Yaxşı ölçüləri və 3-lük atışlarını yerinə yetirmək qabiliyyətləri var. Belə bir oyunda hətta kiçik detallar da önəmlidir. Bizim düşərgədə çox yaxşı atmosfer var. Daim deyirik ki, 2 oyunu qazanmalıyıq. Amma ilk matçda qələbə olmasa, digərinin mənası qalmayacaq. Hamı diqqətini cəmləyib. Azərbaycan üzərində qələbəyə fokuslanmışıq. Kosovoya qarşı matç haqqında heç bir söhbət etməmişik. Yalnız bugünkü oyuna diqqətimizi cəmləmişik”.

Qeyd edək ki, bu gün Dublində keçiriləcək İrlandiya – Azərbaycan matçı saat 21:00-da start götürəcək.