“Bakı mənə çox doğma gəlir. Burada özümü yaxşı hiss edirəm. Bu şəhərdə hər mənada rahatam”.

Prosport.Az xəbər verir ki, bu sözləri “Abşeron”un amerikalı basketbolçusu Aubri Makalpayn klubun mətbuat xidmətinə açıqlamasında deyib.

Azərbaycanda ikinci mövsümünü keçirdiyini xatırladan basketbolçu özünü evindəki kimi hiss etdiyinin bildirib: “Şəhərin təmiz olması və sakitliyi xoşuma gəlir. Böyük şəhərdə böyüyən biri kimi deyirəm ki, bura mənim üçün möhtəşəm yerdir. Bakıda bəyənmədiyim heç nə olmadı desəm, düz olar”.

Komandasının hədəflərindən də danışan basketbolçu bu mövsüm uğurlu nəticə qazanacaqlarına inandığını vurğulayıb: “Komandama çox güvənirəm. İstənilən rəqib ilə mübarizə aparmaq gücündəyik. Bunu geridə qalan oyunlarda göstərə bilmişik. Milli fasilə bizim üçün faydalı oldu. Oyunçuların bir-birini daha yaxşı tanıması üçün əlavə zaman lazım idi. Qalib gəlib, məğlub olsaq belə, ilk müddətdə tam hazır deyildik. Ona görə bu dövr bizim üçün faydalı olacaq. Çatışmayan detallar üzərində durmadan çalışırıq”.

Qeyd edək ki, Azərbaycan Basketbol Liqasında A qrupunda yer alan “Abşeron” 3 turdan sonra 4 xalla turnir cədvəlinin 4-cü pilləsində qərarlaşıb.