16 yaşadək voleybolçu qızlardan ibarət Azərbaycan millisi (U-16) Şərqi Avropa Voleybol Zonal Assosiasiyası (EEVZA) çempionatında iştirak etmək üçün Polşanın Dembitsa şəhərinə yola düşüb.

Prosport.Az xəbər verir ki, U-16 14 oyunçu ilə səfərə yollanıb: Nisə Əlizadə, Mələk Hacızadə, Aysel Nəbiyeva, Fatimə Əliyeva, Liel Vetkina, Kamilla Manaxova, Çinarə Yusubova, Aylin Əlizadə, Dilarə Ağayeva, Nuray Vahablı, Zeynəb Cəfərli, Mədinə Əlibəyova, Məryəm Qocayeva, Çinarə Rəhimova.

Şahin Çatmanın rəhbərlik etdiyi komanda Estoniya, Litva və Ukrayna kollektivləri ilə üz-üzə gələcək. Yığma ilk matçını sabah Estoniyaya qarşı keçirəcək.

Qeyd edək ki, noyabrın 20-23-də baş tutacaq yarış AVRO-2025-ə seçmə xarakter daşıyır. Reqlamentə əsasən, çempion komanda qitə birinciliyinin final mərhələsinə vəsiqə əldə edəcək.

Onu da bildirək ki, bu voleybolçulardan libero Fatimə Əliyeva millimizin sabiq futbolçusu, hazırda "Qarabağ"ın U-15 komandasının baş məşqçisi işləyən Rauf Əliyevin qardaşı qızıdır. Daha bir futbol məşqçisi – "Kəpəz"in məşqçisi Rakif Əliyevin qızı Nisə Əlizadə də hücumçu kimi bu komandada yer alır.