İslandiyanın "Höykar" kişi həndbol komandası EHF Avropa Kubokunun 1/16 final mərhələsinin oyunlarını Mingəçevir şəhərində keçirəcək.

Prosport.Az-ın xəbərinə görə, 1931-ci ildə yaradılmış, Hapnarfyördür şəhərini təmsil edən, mənası "şahinlər" demək olan "Höykar" "Kür" komandası ilə ev oyununu Azərbaycanda keçirməyə razılıq verib.

Beləliklə, islandiyalılar Mingəçevirin "Kür" Olimpiya İdman-Tədris Mərkəzində noyabrın 30-da baş tutacaq qarşılaşmada nominal meydan sahibi sayılacaq. 1 dekabrda keçiriləcək cavab matçında isə Mingəçevir təmsilçisi ev sahibi qismində çıxış edəcək. Hər iki matç saat 17:00-da başlayacaq. 

Xatırladaq ki, 1/32 finalda "Höykar" Finlandiyanın "Riihiməki Koks" komandasını (35:26, 29:27), "Kür" isə Kiprin "Parnassos Strovolu" kollektivini (35:31, 32:29) turnirdən kənarlaşdırıb.

Qeyd edək ki, qadın həndbolu üzrə son ölkə çempionu "Qarabağ" da 1/16 final mərhələsində Ukraynanın "Qaliçanka" komandası ilə hər iki matçını Mingəçevirdə keçirəcək. Həmin matçlar 16 və 17 noyabrda baş tutacaq.