Klubların UEFA reytinqi yenilənib.

Prosport.Az xəbər verir ki, Çempionlar Liqası və Avropa Liqasında IV, Konfrans Liqasında III turun oyunları bəzi dəyişikliklərə səbəb olub.

Azərbaycan çempionu “Qarabağ”ın da mövqeyi dəyişib. Norveçdə “Budö/Qlimt”ə 2:1 hesabı ilə qalib gələn Qurban Qurbanovun komandası 61-ci pillədə qərarlaşıb.

Ağdam klubunun hesabında 32,000 xal var. “Qarabağ”ın xallarının artmaması Liqa mərhələsində zəruri olan göstəriciyə çatmamağı ilə bağlıdır. Belə ki, qələbəyə görə 2 xal prinsipi ilə 3 xal topladıqdan sonra hesabı artırmaq mümkündür. 1 qələbəsi olan Azərbaycan çempionu yalnız növbəti qələbə ilə aktivini zənginləşdirəcək.

Buna görə də ötən ay 58-ci yerə şərik olan “Qarabağ” 3 addım geriləyib. “Qalatasaray”, “Ferentsvaroş” və “Seltik” təmsilçimizi geridə qoyub.

Amma “Qarabağ” yenə “Aston Vila”, “Yunion”, “Lion”, “Sparta”, “Viktoriya” və “Frayburq” kimi komandaları qabaqlayır.

“Neftçi” 8,000 xalla 171-ci yerə şərikdir. Digər klublarımız – “Zirə”, “Sabah”, “Sumqayıt” 4,000 xalla 310-cu, “Qəbələ” və “Şamaxı” 3,925 xalla 323-cü yeri bölüşənlər arasındadır.

Qeyd edək ki, siyahıya 134,000 xala malik “Mançester Siti” başçılıq edir.