"Mənim üçün sürpriz oldu. Bir növ ikiqat bayram oldu. Çünki indiyə qədər aşağı yaş qrupuna aid millilərin heç birinə dəvət almamışdım".

Prosport.Az xəbər verir ki, bunu millimizin debütantı Mustafa Əhmədzadə deyib.

Azərbaycan milli komandasının UEFA Millətlər Liqasının qrup mərhələsi çərçivəsində İsveç və Estoniya yığmalarına qarşı keçiriləcək oyunlar üçün heyəti açıqlanıb. "Araz-Naxçıvan"ın yarımmüdafiəçisi Mustafa Əhmədzadə də millinin heyətinə dəvət alıb.

21 yaşlı futbolçu dəvətlə bağlı danışıb: "Millidə oynamaq, o formanı geyinmək, qalib ordunun yaşıl meydanda əsgəri olmaq fəxrdir. Bu dəvətdə klubun da xidməti danılmazdır. Heç kimin tanımadığı bir futbolçunu komandaya götürdülər, bəzən əvəzetmədən, bəzən isə əsas heyətdə oynamaq şansı verdilər. Buna görə baş məşqçimiz Elmar Baxşıyev başda olmaqla komandama təşəkkür edirəm. Ümid edirəm ki, gələcəkdə klubumuzdan daha çox oyunçu dəvət alar. Ötən toplanışda Vadim Abdullayev orada idi, bu gün mən dəvət aldım. Milli qürur yerimizdir. Çalışacağıq ki, dəvəti, etimadı dogruldaq. Belə sans hər zaman ələ düşmür. Maksimum istifadə etməyə, millinin daimi üzvünə çevrilməyə çalışacağam".