"Şamaxı" Misli Premyer Liqasının XIII turunda səfərdə "Neftçi" ilə 2:2 hesablı heç-heçə edib.

Prosport.Az xəbər verir ki, bölgə təmsilçisinin baş məşqçisi Ayxan Abbasov oyundan sonra keçirilən mətbuat konfransında jurnalistlərin suallarını cavablandırıb:

– Bu gün bayramdır. Prezident İlham Əliyev başda olmaqla hamımızı təbrik edirəm. Şəhidlərimizə Allah rəhmət eləsin. Oyuna gəlincə, xal qazanmaq istəyirdik. "Neftçi" də xal qazanaraq irəliləmək istəyirdi. Matça çox pis başladıq. Geridönüş etmək də çətin idi. Futbolçularım xarakter göstərdi. İlk hissədə 3-cü qolu da vura bilərdik. 2-ci yarıda rəqib yüksək təzyiq etdi. Bizdə vəziyyət yaxşı deyildi. Georgi Kantaria yükün altına girdi, çünki oynaması sual altında idi. Son 4-5 oyunda zədələrə görə tam heyətlə oynamırdıq. Gənclərə fürsət düşür. Bundan yaxşı istifadə edirlər. Bilirik ki, Premyer Liqada qalmaq üçün hər xal bizim üçün vacib olacaq. "Neftçi"dən 1 xal götürmək uğurdur. Hamını təbrik edirəm.

– Sizin karyeranızda da yəqin ilk belə hal idi. 4 dəqiqəyə niyə 2 qol buraxdınız?
– Həqiqətən ilk dəfə belə halla üzləşirdim. Sürpriz oldu. Komandanın isinməsi siqnal verirdi ki, futbolçular oyuna yaxşı köklənib. Yaxşı şeylər gözləyirdik. Şans rəqib tərəfdə oldu. "Neftçi"nin futbolçusunun ustalığı idi. 2-ci qolda ofsayd xətti çəkmək bəlkə də çətin idi. 2 qolun arasında bizim də epizodumuz oldu. Bir anlıq mənə elə gəlirdi ki, futbolçularım ayılacaq. Belə oyunlar komandamız üçün böyük önəm kəsb edir. "Sabah"la matçda da belə olmuşdu. Demək ki, bacara bilirik. İlk hissədəki oyundan 5 dəqiqəni çıxmaqla razı qaldım.

– Komandanız əla refleks göstərdi. Fasilədə təlimatınız nə idi?
– 5 dəqiqəyə görə uşaqları tənbeh etdim. Futbolçulara bunu çatdırmaq lazımdır. Bilirdim ki, rəqib tempi yüksəldəcək. 2-ci hissədə ən real qol epizodu bizdə oldu. Hücumlarımız var idi. Bu gün rəqib "Neftçi"dir. Hərdən azarkeş kənardan müdaxilə edir ki, çıxın qabağa. "Neftçi"nin qələbəsi üçün komandamı qabağa çıxartmağımı istəyirlər. Deyir ki, futbol oynamırsınız, mən də zarafatca dedim, bəs nə oynayırıq? (gülür). Bilirdim ki, təzyiq olacaq. Futbolçulardan bu mübarizəni istəyirdim. Belə mübarizə olduqca, irəlidə yaxşı şeylər olacaq.