"Sabah" basketbol klubu FIBA Avropa Kubokunda növbəti matçını keçirib.

Prosport.Az xəbər verir ki, Rimas Kurtinaytisin rəhbərlik etdiyi kollektiv G qrupunda Yunanıstan təmsilçisi "Marussi" ilə üz-üzə gəlib.

Marussi şəhərində baş tutan qarşılaşma təmsilçimizin 71:82 hesablı məğlubiyyəti ilə yekunlaşıb.

Qeyd edək ki, "Sabah" evdə "Marussi"yə 70:82 hesabı ilə məğlub olub. Azərbaycan komandası həmçinin qrupda keçirdiyi digər oyunlarda Belçikanın "Spiru" klubuna evdə 68:78, səfərdə 81:82, İsveç təmsilçisi "Norşöpinq Dolfins"ə isə 70:74 hesabı ilə yenilib. 5 xalla sonuncu olan Azərbaycan çempionu qrupda son matçını İsveçdə keçirəcək.

Baş məşqçi Rimas Kurtinaytisin “Marussi” ilə cavab oyunundan sonra bu fikirləri səsləndirib: “Oyunla bağlı deyiləcək çox söz yoxdur. Rotasiya ilə bağlı problemlərimiz davam edir. Üstəlik oyunun gedişində KamRon Blunun da zədələnməsi yekun nəticəyə təsir etdi. Digər oyunçumuz Artyom Butyankovun isə zədəsi tam sağalmayıb. Bu səbəbdən az oynadı. Rotasiya imkanlarımızın məhdud olması səbəbindən 5 oyunçumuz 35 dəqiqə oyunda oldu. Bu əsas problemdir. Səhvlərimiz də oldu.

FIBA-nın mövcud reqlamentində yerli oyunçu potensialı çox əhəmiyyətlidir. Biz aqressiv, sürətli oyun üslubuna üstünlük veririk. Bu səbəbdən ehtiyat oyunçular skamyası çox vacibdir”.