Azərbaycan Basketbol Liqasının III turunda keçirilən oyunlardan sonra baş məşqçilər fikirlərini bildirib:
Prosport.Az onları təqdim edir:
"Quba" – "Lənkəran" 81:86
Şəhriyar Əsgərov ("Quba"): “Yaxşı idik, sadəcə məğlub olduq. Rotasiyalar az idi. Məqsədimizə çatmağa az qalmışdıq. Rəqib də yaxşı oynadı. 4-cü periodda qalibiyyətə yaxın idik. Sonda hakimin mübahisəli hücum foulu planlarımızı alt-üst etdi. Rəqibi təbrik edirəm, çox gözəl oynadılar. Əfsuslar olsun ki, yenə uduzduq. Oyunçularıma ruhdan düşməməyi və gələcəyə nikbin baxmağı məsləhət görürəm. Yaxşı olacağına inanıram. Düzdür, rəqiblərimizin hamısı güclüdür. Çalışacağıq ki, hər şey yaxşı olsun. Sadəcə, rotasiya məsələsi var. Çalışacağıq ki, qələbə qazanaq”.
Georgi Kondruseviç ("Lənkəran"): “Yaratdığımız vəziyyətlər “Sumqayıt”la matçdan daha yaxşı idi. Amma çox çalışmaq lazımdır. Problemlər var və bunları həll etməliyik. Amma komandanın matça köklənməyi çox yaxşı idi. İnanıram ki, bu hər zaman belə olacaq. Bu oyunun gedişinə çox təsir etdi. Bizim üçün çətin oldu. “Quba”nın qələbəsi yox idi və bu səbəbdən də əllərindən gələni edirdilər. Bütün oyunçularımın çıxışını bəyəndim. Heç kimi fərləndirməyəcəyəm. Çünki biz bütöv bir bir komandayıq”.
"Şəki" – "Sumqayıt" 101:61
Bedri Meriç ("Şəki"): "İlk növbədə oyunçularımı təbrik edirəm. Çox istəkli idilər. Qələbə qazanacağımıza çox inanırdıq. İlk 2 oyunda müdafiədə səhvlərimiz vardı. Bir az onu düzəltdik. Rəqibin əksik heyətlə Şəkiyə gəlməsinin də bunda rolu oldu. Ancaq biz də həqiqətən əla oynadıq. Məncə, rəqib tam heyətlə gəlsəydi belə, qələbə qazanan tərəf biz olacaqdıq. Çünki oyunçular, dediyim kimi, çox istəkli idi. 5 oyunçumuz 10 xal və çox atışlar etdi. Bu da komandanın hamısının bu qələbədə payının olduğunu göstərir. Ərcan Donat 8 xal qazandı. Belə davam etsək, qrupda, xüsusən Şəkidə keçirdiyimiz oyunlarda favorit biz olacağıq. Tariel Yusifzadə dünən komandaya qoşuldu. Açığı, onu oynada bilərdik. Ancaq komanda oyunçularını tanıma vaxtına ehtiyacı var. Qarşıdakı fasilədən yararlanıb bu adaptasiyanı da keçəcək".
Aleksandr Mixaylov ("Sumqayıt"): "Ribaundları uduzduq və bu da rəqibin fərqi artırmasına səbəb oldu. Oyunçular belə vəziyyətlərdə bir-birinə dəstək olmalıdır. Rəqibin də oyununu təqdir etmək lazımdır. Əla hücumlar qurdular. Dəqiqlik faizləri də yüksək idi. Biz isə dəfələrlə hücumdan boş dönürdük. Nəyisə dəyişmək istədik, bir ara xal fərqinin də çox da artmasına imkan vermədik... Nəsə bəhanə axtarmağa dəyməz. Belə çətin vəziyyətlərdə oyuna tam köklənmək lazımdır. Belə məğlubiyyəti kənardan izləmək üzücüdür. Epizodik məqamlarda yaxşı oynadıq, amma ümumilikdə zəif təsir bağışladıq. Bəli, zədəli oyunçularımızın yoxluğu da müəyyən mənada öz sözünü dedi. Bəlkə də onlar meydanda olsaydı, qarşımızda fərqli mənzərə yaranacaqdı. Amma istənilən halda xarakter nümayiş etdirmək lazımdır".
"Abşeron" – "Sabah" 59:75
Ərhan Toker ("Abşeron"): "Əslində rəqib hazırda ideal durumda deyildi. Qələbə də qazana bilərdik. Lakin biz kasad heyəti olan komandayıq. Ümumi olaraq oyunumuzu inkişaf etdirmişik. Heç də pis oynamadıq. Komandam yaxşı təsir bağışladı. Amma dəqiqələr keçdikcə onların heyət genişliyi öz sözünü dedi. Biz istədiyimiz rotasiyanı edə bilmirdik. Bir də onu söyləyim ki, bizim qarşımızda qoyulan əsas hədəflərdən biri də gənclərin oynamasıdır. Bu isə bəzən dezavontaja gətirib çıxarır. Bizim də daha təcrübəli yerli oyunçumuz olsaydı, oyun sona qədər daha bərabər mübarizə şəraitində gedə bilərdi. Buna baxmayaraq, böyük bir zaman kəsiyində bərabər oyunu davam etdirdik. "Sabah" çox yaxşı təşkilatlanmış, yaxşı oyunçulara sahib bir komandadır. Onlara qarşı belə oyun göstərdiyimizə görə məmnunam... Abşeron Olimpiya İdman Kompleksində ilk oyunumuz idi. İzləməyə gələn çox oldu. Bunun "Sabah"la da bağlılığı ola bilər. Onlar güclü və çempion komandadır. Bəlkə onları da izləmək üçün gəliblər. Hər hansı səbəb fərq etmir. Bu bizi sevindirir və ümid edirik ki, bizim digər ev oyunlarına da dəstək üçün arenaya gələcəklər".
Rimas Kurtinaytis ("Sabah"): “Zədə səbəbindən 2 ucaboy basketbolçumuz – DeAndre Vilyams və Artyom Butyankovun xidmətindən istifadə edə bilmədik. İlk 2 periodda yaxşı çıxış etməsək də, layiqli qələbə qazandıq. Bu oyun bizim üçün “asan gəzinti” olmadı. Zədəli oyunçularımızın çoxluğu səbəbindən əsas heyət üzvlərinə istirahət verə bilmədim. Gərgin qrafikə görə oyunçulara bir qədər dincəlmək imkanı verəcəyəm. “Marussi” ilə oyuna qədər güc toplamalıyıq. DeAndre bu dəfə də oynamayacaq. Məşqdə zədələnən Artyomun isə “Marussi” ilə oyuna kimi sıraya qayıdacağına ümid edirəm”.