Bu gün Azərbaycan Basketbol Liqasının III turunda debütant "Ordu" Bakı İdman Sarayında "Gəncə"yə 61:82 hesabı ilə uduzub.

Prosport.Az hər iki komandanın baş məşqçisinin fikirlərini təqdim edir:

Halil Atlı ("Gəncə"): "Komandama göstərdikləri mübarizə əzminə görə təşəkkür edirəm. Yer aldığımız qrupda 1-ci yerdəyik. Amma mövsüm hələ irəlidədir. Oyun daha yaxşı işlər görə biləcəyimizi göstərdi. Matça hazırlıq çərçivəsində həftə ərzində üzərində dayandığımız texniki-taktiki sistem ilə meydanda üstün oynadıq. Nəticəsini də aldıq. Rəqibimiz ilk 2 matçda 100 xalla oynayıb. Bu gün onları 61 xalda dayandırmağımız çox önəmlidir. Hücumda yaxşı oynayırıq. Rəqibi təhlil edirik. Uşaqlar onlara verilən tapşırıqları lazımınca yerinə yetirməyə çalışır. Azarkeşlərimiz yanımızda yox idi, bu qələbəni onlara həsr edirik. Çempionatda fasilə olacaq. Bundan ən yaxşı şəkildə yararlanmağa çalışacağıq".

Alberto Blanko ("Ordu"): "İlk növbədə “Gəncə” komandasını qələbə münasibəti ilə təbrik edirəm. Onlar buna layiq idi. Oyun bizim üçün yaxşı keçmədi. Atışları düzgün yerinə yetirə bilmədik. Topu səbətə atmaq üçün yaxşı imkanlar yaratmadıq. Ancaq ilk periodda rəqiblə başa-baş mübarizə apardıq. Sonrakı hissələrdə bütün komponentlərdə rəqibə uduzduq. Bu gün həm də ciddi itkimiz var idi. Səid İsmayılov meydanda deyildi. Onun yoxluğu da oyunumuza təsir göstərdi. Bu oyunu artıq yaddan çıxarmalıyıq. Artıq qarşıdakı oyunlara köklənməliyik".