NTD Azərbaycan Basketbol Liqasının III turunda "Neftçi"yə 66:63 qalib gəlib.

Prosport.Az baş məşqçi fikirlərini təqdim edir: 

Tahir Baxşıyev (NTD): “Çox vacib qələbədir. İdmanda şans faktoru həmişə mühüm rol oynayır. Ancaq uşaqların əməyini qeyd etmək istərdim. Bəli, səhvlər çox idi. Amma müdafiədə oynumuz çox xoşuma gəlir. Hər 3 oyunda. Hücumda isə artırmalıyıq. Qələbədən çox məmnunam. Hesab edirəm ki, oyunçular arasında anlaşma yaxşılaşır, amma 3 oyundan sonra buna tam nail olmaq çox çətindir. Daha çox çalışacağıq. Hazırda çempionatda milli komandaların oyunları ilə əlaqədər fasilə yaranacaq. Daha çox məşq etməyə vaxt olacaq... Murad Babayev hərbi xidmətdə olduğundan hər oyunda bizə kömək edə bilmir. Məhəmməd Hüseynli artırır, məşqlərdə çalışır. Gələcəkdə bizim üçün çox faydalı ola bilər”.

Anar Sarıyev ("Neftçi"): "Öncə oyuna görə basketbolçularıma təşəkkür etmək istəyirəm. NTD komandasını isə qələbə münasibətilə təbrik edirəm. Kamran Məmmədovun yoxluğu çox açıq görünürdü. Təbii ki, onun yoxluğunda Amil Həmzəyevə də o qədər müddətə mübarizə aparmaq çətin idi. Qarşıda uzun fasilə var. Bu müddət ərzində səhvlərimiz və bütün çatışmazlıqlar üzərində çox ciddi işləyəcəyik. Ümumiyyətlə, həmin vaxtdan maksimum yararlanmağa çalışacağıq. Əminəm ki, komanda bu uzun fasilədən sonra daha yaxşı olacaq".