"Komandamı qələbə münasibəti ilə təbrik edirəm. Yolumuza davam edirik. Düşünürəm ki, bu da bizim maksimumuz deyil. Oyun planında daha da artırmalıyıq".

Prosport.Az xəbər verir ki, bu sözləri "Araz-Naxçıvan"ın baş məşqçisi Elmar Baxşıyev Misli Premyer Liqasının XII turunun "Neftçi" ilə oyunundan (1:0) sonra keçirilmiş mətbuat konfransında deyib. O, jurnalistlərin suallarını da cavablandırıb.

- İlk yarıda dinamik, hücumameyilli oynasanız da, ikinci hissədə bir az zəif göründünüz. Hətta bir sıra dəyişikliklər də etdiniz. Amma bunun da nəticəsi olmadı....

- Futbolda elə qanun yoxdur ki, əvəzetmədən meydana daxil olan futbolçu oyunu dəyişməlidir. Birinci hissədə Bəxtiyar Həsənalızadə zədələndi. Ona uyğun rotasiyaya getməyə məcbur qaldıq. Çünki həmin mövqedə yerli olmadığı üçün əcnəbi futbolçumuzu meydana buraxdıq. İkinci hissə daha çox epizodlara girdik. Sadəcə, son nöqtəni qoya bilmədik.

- Qara Qarayev ehtiyat skamyada idi.  Onu niyə oynatmadınız?

- Qaranın durumu hamıya bəllidir. İki gün öncə mənim istəyimlə komandaya qoşulub. Günlər keçdikcə Qara komandamıza fayda verəcək.

- Psixoloji, yoxsa fiziki cəhətdən hazır deyil?

- Psixoloji durumu qaydasındadır. Keçmişlə yaşayacağıqsa, gələcəyə heç vaxt ümid olmayacaq. Onu başa düşür. Qaraya hər bir dəstəyi verməyə hazırıq. Təcrübəli futbolçudur. Yaxşı səviyyəyə çatacaq.

- Turan Vəlizadəyə göstərilən qırmızı vərəqəni haqlı sayırsınız?

- İki sarı vərəqə ilə cəzalandırıldı. Cavan futbolçudur. Cavanlarda emosiya daha artıq olur. İki oyun epizodu idi. Daha təmkinli olmalıdır. Ona ümumi irad yoxdur.