"Quba" Basketbol Klubu hələ ki ev oyununu Bakıda keçirir. Çünki Quba Olimpiya İdman Kompleksi təmirdədir. Ancaq çalışırıq ki, komanda ev oyunlarını Qubada keçirsin. Çox güman ki, növbəti ev oyunu Qubada baş tutacaq".

Bunu Prosport.Az-a açıqlamasında Azərbaycan Basketbol Federasiyasının icraçı vitse-prezidenti Fərrux Mahmudov deyib.

"Quba" klubu Azərbaycan Basketbol Liqasının III turu çərçivəsində "Lənkəran"la ev oyununu Bakı İdman Sarayında keçirəcək. Buna səbəb Quba Olimpiya Kompleksinin təmirdə olmasıdır. IV tur çərçivəsində "Sumqayıt"la ev oyunu isə Qubada keçirilə bilər.

Ötən mövsüm Xaçmazda ev oyunlarını keçirən NTD klubu isə bu mövsümdən doğma məkan kimi Bakı arenalarından istifadə edir. Daha əvvəl ev oyununu Bakı İdman Sarayında keçirmiş NTD bu gün "Neftçi"ni "Sərhədçi" İdman Mərkəzində qəbul edəcək.

F.Mahmudov bunun səbəbini belə izah edib: "NTD hər iki areda oynaya bilər. Hansı arena boşdursa, orda da oyun keçirəcək".

O, "Sumqayıt"ın 3 basketbolçusu zədəli olduğu üçün "Şəki" ilə oyunu təxirə salmaq istəyi barədə isə bunları deyib: "Hər hansısa klub reqlamentə əsasən təxirəsalmanı cərimə ödəməklə həyata keçirə bilər. Ancaq noyabrın 3-də "Şəki" – "Sumqayıt" oyunu baş tutacaq".