“Naxçıvan” basketbol klubu "Sərhədçi"yə Azərbaycan Basketbol Liqasının III turunda 83:66 qalib gəlib.
Prosport.Az oyunla bağlı hər iki komandanın türkiyəli baş məşqçisinin fikirlərini təqdim edir:
Murat Dikmən ("Naxçıvan"): "İlk olaraq rəqib komandanı təbrik edirəm. Həqiqətən onlar da yaxşı mübarizə apardı. Dəyərli bir qalibiyyət əldə etdik. Həm çempionatdakı ilk 3 matçda 3 qələbə qazanmaq, həm də yaxşı basketbol oynamaq bizim üçün çox vacib idi. Hər həftə daha da yaxşı çıxış edəcəyimi bildirmişdim. Keçən həftə yaxşı oyun sərgiləmədən qələbə qazandıq. Bu məni qane etmirdi. Amma bu oyunun ilk dəqiqəsindən sonuna qədər yaxşı mübarizə apardıq. Yaxşı müdafiə olunduğumuzu düşünürəm. Rəqibimizi 66 xalda saxlamaq bizim üçün çox önəmlidir. Hədəflərimiz həqiqətən çox böyükdür. Bu qrup yaxşı kollektivlərdən ibarətdir. Artıq önümüzdəki “Abşeron” BK ilə olan matça baxacağıq. O matça kimi 3 həftəlik fasilə olmağı bizim üçün pis oldu. Yaxşı bir ritm yaxalamışdıq, lakin bu fasilə bizə pis təsir edəcək. Amma bu bütün komandalar üçün keçərlidir. Ümid edirəm ki, “Abşeron” matçı ilə qaldığımız yerdən davam edərik. Yaxşı yoldayıq. Oyunçularım bir-birilərinə uyğunlaşmış durumdadır. Komandamdan razıyam".
Evren Alkaya ("Sərhədçi"): “Çətin oyun olacağını bilirdik. “Naxçıvan” komandası bizdən daha əvvəl toplandı. Ötən mövsüm də heyətində oynamış 2 basketbolçunu saxladığı üçün sistemi rahat qura bildilər. Oyuna əslində çox yaxşı başladıq. Səbətin altında istədiyimiz xalları qazandıq. Amma müdafiədə bəsit səhvlər etdik. Hücumlar zamanı oyunçu yerdəyişmələrində ciddi xətalara yol verdik. Rəqib də bundan istifadə edib 3 xallıq atışlarla önə keçdi. Yaxşı müdafiə olunmamaq səbəbindən hücum və müdafiə intizamını qoruya bilmədik. Lazımlı oyunçu dəyişiklikləri ilə daha yaxşı olacağıq. Oyunçularımızın üstü səviyyəyə gələcəyinə inanıram. Yeni aldığımız oyunçu da 2 gündür ki, buradadır və adaptasiya keçə bilməyib. Qarşıdakı 1 ayda hazırlaşıb liqanın ən yaxşı komandalarından birinə çevriləcəyik. Komanda olmaq elə də asan deyil. 10-12 oyunçu bir yerə gəlib eyni şeyləri etməyə çalışır. Bunu qurmaq üçün də zaman lazımdır. Dediyim kimi bir neçə oyunçu dəyişikliyi ilə komandamızı yaxşı səviyyəyə çıxaracağıq. Əksiklərimizi yaxşı gördük”.