Kişi həndbolu üzrə gümüş medalçı "Bakı" klubu avrokuboklarla erkən vidalaşıb.

Prosport.Az-ın xəbərinə görə, Eldar Fərəcovun yetirmələri EHF Avropa Kubokunun 1/32 final mərhələsinin ilk oyununda Monteneqronun "Lovçen" komandasına 21:41 uduzub.

Bu gün keçirilmiş matçda isə "Lovçen" "Bakı"nı 37:23 məğlub edib. Tərəflərin razılığına əsasən hər iki matç yeni təmirdən çıxmış Setinye İdman Mərkəzinin zalında baş tutub.

Bununla da "Lovçen" 1/16 finala vəsiqə qazanıb. Həmçinin, Setinye təmsilçisi 2009-cu ildən sonra ilk dəfə avrokuboklarda qələbə qazanıb. Həmin ilin noyabrın 14-də Monteneqro klubu Kuboklar Kuboku turnirində Fransanın "Trombley" komandasına 27:24 qalib gəlmişdi (1 həftə sonra keçirilmiş cavab oyununda fransızlar 33:20 qalib gələrək mərhələ adlamışdı – red.).

Qeyd edək ki, bu gün son Azərbaycan çempionu olan Mingəçevirin "Kür" komandası Kiprin "Parnassos Strovolu" komandasına 2 oyunun cəminə görə qalib gələrək (35:31, 32:29) 1/16 finala vəsiqə qazanıb.