Azərbaycan Basketbol Liqasında II turun daha bir oyunu keçirilib.

Prosport.Az xəbər verir ki, B qrupunda "Sumqayıt" evdə "Lənkəran"la qarşılaşıb.

Sumqayıt Olimpiya İdman Kompleksində baş tutan görüş debütant olan qonaq komandanın 93:71 hesablı qələbəsi ilə yekunlaşıb. Bu, "Lənkəran"ın tarixində ilk qələbə olub.

Baş məşqçilərin fikirlərini təqdim edirik:

Aleksandr Mixaylov ("Sumqayıt"ın baş məşqçisi): "2-ci hissədə sərgilədiyimiz oyuna görə təəssüf hissi keçirirəm. Halbuki ilk periodda əla oynamışdıq. Rotasiya ilə bağlı problemlər yaşadıq. Komandada təravət çatışmadı. Aqressiv oynaya bilmədik. 10 xaldan artıq üstünlüyü əldən verdik. Nə hücum yaxşı idi,  nə də müdafiə. Saadettin Donatın zədələnib çıxması da oyunumuza mənfi təsir göstərdi. Saadettin komandamızın aparıcı yerli oyunçusudur. Əvəzetmələrin olmaması öz sözünü dedi. Onun yoxluğu bizim üçün itkidir. "Ordu" ilə matçda özünü yaxşı tərəfdən göstərən Kalen Melounun da oyunu getmədi. Bizi bu gün dəstəkləməyə gələn azarkeşlərimizə təşəkkür edirəm".

Georgi Kondruseviç ("Lənkəran"ın baş məşqçisi): “Oyunumuzun keyfiyyətinə fokuslanmışıq. Hələ də çətinliklərlər var. Düzəldiləsi şeylər var. Rəqib ilk yarıda öz oyununu göstərdi. Biz isə I turda Lənkərandakı kimi oynadıq. 2-ci yarıda dəyişiklik etməli idik və məmnunam ki, komandamız danışdıqlarımızı həyata keçirə bildi. Qələbə həmişə xoşdur, xüsusilə də 1-ci. Klubu ilk qələbəsi münasibətilə təbrik edirəm”.

Qeyd edək ki, turun açılış matçında A qrupunda “Naxçıvan” NTD kollektivinə 72:71 hesabı ilə qalib gəlib. II turun digər matçları oktyabrın 26-27-də reallaşacaq.