"Oyunun gedişatına əsasən onu deyə bilərəm ki, ən pis matçlarımızdan biri oldu. Görüşün əvvəlini istisna edə bilərik. Şükür Allaha qələbə qazandıq. Uşaqlara dedim ki, bundan nəticə çıxarmalıyıq".

Prosport.Az xəbər verir ki, bu sözləri "Turan Tovuz"un baş məşqçisi Qurban Berdiyev Misli Premyer Liqasının XI turunun "Kəpəz"lə görüşündən sonra keçirilmiş mətbuat konfransında deyib. O, jurnalistlərin suallarını da cavablandırıb.

– Bu gün bəxtiniz gətirdi ki, qələbə qazandınız?
– Bəli. Razıyam, bəxtimiz gətirdi.

– Rəqib autsayderdir. Ola bilər ki, futbolçular oyuna rahat çıxmışdı?
– Xeyr. Belə bir şey ola bilməz. Çünki oyunun əvvəlində futbolçularım daha diqqətli idi. Fikirləri oyunda idi. Ancaq futbolçulara demişdim ki, "Kəpəz" hazırda layiq olduğu yerdə deyil. Onlar pis futbol oynamır. Sadəcə, bəzi anlarda bəxtləri gətirmir. Ona görə biz tərəfdən qiymətləndirməmək ola bilməz.

– Xəyal Nəcəfov mövsümə yaxşı başlamışdı, sonradan milliyə də dəvət aldı. Ancaq milliyə dəvət aldıqdan sonra "Turan Tovuz"da əsas heyətdəki yerini itirib. Bunu nə ilə əlaqələndirirsiniz?
– Bəli, razıyam. Xəyal milliyə qədər yaxşı görünürdü, komandanın da liderlərindən biri idi. Amma millidən sonra Şəhriya Əliyev və Xəyalın vəziyyəti bir qədər yaxşı olmadı. Forma yığmağa başladılar. Ancaq yenidən stabil olmadı. Fiziki baxımdan bir qədər yaxşı deyildi. Məsələ millinin baş məşqçisində deyil. Mən ona xüsusi hörmətlə yanaşıram. Məsələ Xəyaldadır. Şəhriyarla müqayisədə o millidən daha hazır vəziyyətdə gəlir. Həmçinin Xəyalın bəzi şəxsi problemləri də var, ailə ilə bağlıdır. Bu yöndə bacardığımız dəstəyi göstərmək istəyirik. Ümid edirik ki, formasını bərpa edəcək.