"Sona kimi mübarizə apardıq. Lakin təəssüf ki, digər oyunlarda olduğu kimi, yenə sonluğu gətirə bilmədik".

Prosport.Az xəbər verir ki, bunu "Sabah" basketbol klubunun baş məşqçisi Rimas Kurtinaytis İsveçin "Norşöpinq Dolfins" klubuna qarşı keçirdikləri FIBA Avropa Kubokunun oyunundan sonra baş tutan mətbuat konfransında deyib.

Litvalı mütəxəssis məğlub olduqları görüş barədə danışıb: "Matçın sonlarında ekstra nələrsə etmək lazım olanda bunu bacarmırıq. Adi epizodlarda top itkilərinə yol verdik. Görüşdən öncə oyunçulara dedim ki, nə qədər yaxşı müdafiə olunsaq da, qələbə üçün bu qarşılaşmada bizə 80 xal yığmaq lazımdır. İstənilən halda, bundan sonra da hər qarşılaşmaya qələbə üçün çıxacağıq. DeAndre Vilyamsın yoxluğu hiss olunurdu. O bizim ən çox xal qazanan basketbolçumuzdur".

Qeyd edək ki, "Sabah" – "Norşöpinq Dolfins" qarşılaşması qonaqların 74:70 hesablı qələbəsi ilə başa çatıb.