Azərbaycan Basketbol Liqasının II turunun açılış oyununda ötən mövsümün gümüş medalçıları "Naxçıvan" bürünc mükafatçılar NTD-ni 72:71 məğlub edib.

Prosport.Az oyundan sonra hər iki komandanın baş məşqçisinin fikirlərini təqdim edir: 

Murat Dikmən ("Naxçıvan"ın baş məşqçisi): "Əslində bugünkü qələbə məni xoşbəxt etmədi. Yaxşı oynamadıq. Bu durumda qələbə qazanmaq bizim üçün çox önəmli idi. İlk olaraq NTD komandasını təbrik edirəm, yaxşı mübarizə apardılar. Həqiqətən də çox pis basketbol oynadıq. Bizə yaraşanı edə bilmədik. İstər hücumda, istərsə də müdafiədə çox səhvlərə yol verdik. Kollektivimiz yenidir və hələ yolun əvvəlindəyik. Önəmli olan səhvlərimizdən dərs çıxarmaqdır. 2-ci qalibiyyətimizdir. Oyunçularımı mübarizələrindən ötrü təbrik edirəm. Bundan sonra adi səhvlər etmədən qalib gəlməliyik. Daha yaxşı oynamalıyıq. Basketbolçularıma çox güvənirəm".

Tahir Baxşıyev (NTD-nin baş məşqçisi): "Oyuna böyük istəklə çıxdıq. Əslində çox şeydən razı qaldım. Matçda sürət var idi, müdafiədə də yaxşı çıxış etdik. 45 dəqiqə ərzində rəqibə cəmi 72 xal verdik. Ən böyük problem sərbəst atışlar idi. 9 qeyri-dəqiq atış yerinə yetirdik. Rəqibin yalnız 2 səhvi oldu. 1 xal fərqi ilə uduzduq. Belə oyunda bu qədər səhv etmək olmaz. Qalib gələ bilərdik. Ümumi görüşdən razıyam, yalnız hesab məni razı salmır. Qalib gəlsəydik, hər şeydən məmnun olardım".