"Naxçıvan" və "Neftçi" komandalarının baş məşqçiləri Azərbaycan Basketbol Liqasının yeni mövsümünün açılış oyunundan sonra açıqlama veriblər.

Prosport.Az xəbər verir ki, mütəxəssislər muxtar respublika təmsilçisinin 84:79 hesablı qələbəsi ilə başa çatan matçı şərh ediblər:

Murat Dikmən (“Naxçıvan”): "İlk olaraq “Neftçi” klubunu təbrik edirəm. Komandamız keçən ildən fərqli olaraq bu mövsüm “Naxçıvan” adı ilə mübarizə aparır. Bütün oyunçularımızı dəyişdirmişik yalnız əsas heyətdən Cordan Perkinslə müqavilə müddətini uzatmışıq. Yeni komanda qurmuşuq. İlk görüşə görə komandam yetəri qədər istəkli və arzulu idi. Xüsusilə müdafiənin bəzi bölümlərində çox yaxşı mübarizə apardıq. Gün keçdikcə komanda daha da yaxşı çıxış edəcək. Hələ mövsümün əvvəlidir. Xırda çatışmazlıqlarımızı bərpa edəndən sonra keçənilki kimi çıxış edən bir kollektiv olacağıq.  Bunun üçün zamana ehtiyacımız var. İrəliyə doğru gedərkən də qazanmaq çox vacib idi. Mövsümün davamında uzun oyunçu axtarışımız davam edir. Rəhbərliyimizə də təşəkkür edirəm ki, artıq bununla bağlı işlərə başlayıblar. Bu istəyimiz də gerçəkləşərsə, keçən mövsümkü kimi yaxşı yerlərdə olacağıq".

Anar Sarıyev ("Neftçi"): "Birinci oyunumuz idi, həm də yeni oyunçularımız var. Səhvlərimiz həddindən artıq çox oldu. Bu səhvlərin üzərində işləyəcəyik. Qələbə də qazana bilərdik. Belə deyim də, bu oyun gəldi-getdi, gah biz önə çıxdıq, gah da "Naxçıvan" komandası. Qarşılaşmanın sonuna doğru səbətin altında da çox pis oynadıq, heç bəyənmədim. Təbii ki, məşqlərdə onu da müzakirə edəcəyik. "Naxçıvan" komandasını təbrik edirəm. Biz də toparlanıb növbəti oyunumuza  hazırlaşacağıq".