Fransanın Monpelye şəhərində keçirilən çimərlik voleybolu üzrə Avropa Kubokunda (Beach Volley European Cup) "Azərreyl"in qadın və kişilərdən ibarət komandası çempion olub.

Prosport.Az xəbər verir ki, qadın komandamız Ukraynanın "Sunrays" Çimərlik İdman Akademiyasına qarşı oynanılan final görüşündən qalib ayrılan tərəf olub.

2 oyundan 1-də “Azərreyl" (2:1) digərində isə rəqib (2:0) qalib gəlib. Ardınca baş tutan qızıl setdə gərgin mübarizədən sonra 15:12 hesabı ilə üstün olan təmsilçimiz yarışın qalibi adını qazanıb.

"Azərreyl" klubunun kişilərdən ibarət komandası isə həlledici matçda İspaniyanın “Ponyente Benidorm“ komandası ilə qarşılaşıb.

2 görüşün 1-də "Azərreyl" (2:1), digərində İspaniya təmsilçisi (2:1) qalib gəlib. Qalibi müəyyənləşdirmək üçün keçirilən qızıl setdə 15:12 hesabı ilə üstün olan təmsilçimiz Avropa Kubokunda çempion adına yiyələnib.

Qeyd edək ki, "Azərreyl"in qadın komandasında Fidan Əhmədxanova, Olqa Motriç, Adelya Əhmədova, Alina Salmanova, Arina Yarantseva, Larisa Smeltsova, kişi komandasında isə Qerman Aleksandrov, Konstantin Semyonov, Vadim Kutukov, İqor Veliçko, Heydər Məmmədli və Dmitri Veretyuk yer alıb. Komandalar meydana İqor Olefir (kişilər) və Nihad Tarverdiyevin (qadınlar) rəhbərliyi altında çıxıb.

Xatırladaq ki, ötən il Azərbaycanın "Murov Az-Terminal" kişi komandası Avropa Kubokunun qalibi olmuşdu.