"Bizi maraqlı çempionat gözləyir. Komandalar yeni formatlı çempionatda mübarizə aparacaqlar".

Prosport.Az xəbər verir ki, bu sözləri Azərbaycan Basketbol Federasiyasının prezidenti Emin Əmrullayev ölkə çempionatında 2024/2025-ci illər mövsümünün açılışına həsr olunmuş tədbirdən sonra jurnalistlərə açıqlamasında deyib.

O, bölgələrdə yeni klubların yaradılmasının sevindirici hal olduğunu bildirib: "Artıq bu il Quba, Lənkəran və Naxçıvan şəhərlərində basketbol oyunlarını izləyəcəyik. Bu da liqamızın güclənməsinə səbəb olacaq. Bütün klubların sponsorları var. Federasiya olaraq gələcəkdə klubların işinə dəstək vermək niyyətindəyik".

Qurum rəhbəri ölkə çempionatının yeni mövsümündə tətbiq olunacaq legioneri limiti ilə bağlı məsələdən də söz açıb: "Ötən mövsümü analiz edərək, yerli çempionatda legioner sayının çox olmasına qərar verdik. Legioner limitini “3+2” saxladığımız zaman keyfiyyətli əcnəbi oyunçu gətirmək imkanlarımız azalır. Çünki buraya gələn oyunçular daha çox oynamaq istəyirlər. Buna görə də 3-4 il liqada “4+1” limiti tətbiq ediləcək. Daha sonra yenidən “3+2”yə qayıdacağıq. Düşünürəm ki, azarkeşlər maraqlı basketbol oyunlarının şahidi olacaqlar".

"Sabah" basketbol komandasının FIBA Avropa Kubokundakı çıxışına da toxunan E.Əmrullayev Azərbaycan çempionuna inandığını bildirib: "Bu komanda ötən il müntəzəm mərhələyə vəsiqə qazanmaqla tarixi uğura imza atdı. “Sabah" bu mövsüm daha da güclənib. Onlar Avropa Kubokunda son sözlərini qarşıdakı matçlarda deyəcəklər".

Qeyd edək ki, Azərbaycan Basketbol Liqasında yeni mövsümə oktyabrın 18-də keçiriləcək "Neftçi" - "Naxçıvan" oyunu ilə start veriləcək.