Azərbaycan Basketbol Liqası təmsilçiləri "Abşeron" və "Naxçıvan" kollektivləri yoxlama görüşündə üz-üzə gəlib.

Prosport.Az xəbər verir ki, qarşılaşma 84:82 hesabı ilə Abşeron təmsilçisinin xeyrinə başa çatıb.

Oyun Memarlıq və İnşaat Universitetinin idman zalında keçirilib.

"Naxçıvan"la keçirilən yoxlama oyunundan sonra "Abşeron"un yeni baş məşqçisi Ərhan Toker klubun mətbuat xidmətinə açıqlama verib: 

"Biz ən gec hazırlıqlara başlayan komandayıq. Bizim xüsusən legioner oyunçularımız 1 həftə əvvəl komandaya qoşuldu. Əslində oyun keçirməyə hazır deyildik, amma liqanın startına zaman az qalıb. Ona görə də məhz bu gündən (dünəndən – red,) etibarən yoxlama matçları oynamağa start verdik. Bu gün oyunçularımın nələrə qadir olduqlarını gördüm. Oyun baxımından üzərində çalışdığımız bəzi məsələlər yaxşı alınsa da, bəzi məsələlər məni qane etmədi. Bu səhvlər üzərində işləyəcəyik. Qarşıda hələ bizi bir neçə yoxlama matçı gözləyir. Liqaya yaxşı start vermək istəyirik. Bunun üçün məşqlərimizi intensiv şəkildə davam etdirəcəyik.

Oyunçularımı fərqləndirməyi sevmirəm. Çünki bu  iş günlük performansdan asılı ola bilən oyundur. Burada pis gözə dəyən basketbolçudan biz mövsümdə əla oyun görə bilərik. Komanda üzvlərinin mücadiləsindən məmnunam".