“Lənkəran”nın basketbolçusu Ceremi Berayt klubun mətbuat xidmətinə müsahibə verib.

Prosport.Az həmin müsahibəni təqdim edir:

– Azərbaycanda oynamaq təklifi aldıqda ilk olaraq nələri araşdırdınız?
– Ailəmin narahat olmaması üçün araşdırdığım ilk şey ölkənin təhlükəsiz olub-olmaması idi. Amerikalıları hər yerdə yaxşı qarşılamırlar. Azərbaycan haqqqında internetdə yüksək mədəni dəyərlərə sahib olan qonaqpərvər ölkə kimi bəhs edilirdi.

– Bəs Lənkəranda ən çox bəyəndiyiniz nədir?
– Şəhərin gözəl atmosferi var. Mənim üçün hər şeydən uzaqlaşa biləcəyim bir yerin olması çox vacibdir. Mən musiqi ilə məşğul oluram, ona görə də basketboldan uzaqlaşıb gitaramı çala biləcəyim və ya fortepianoda ifa edə biləcəyim bir yer tapmaq istəyirəm. Görək də…

– Məşqlər necə gedir? Şəhərə alışmısınız?
– Ən vacib şey yuxu rejiminizin dəyişməsidir. Arada 10 saatlıq fərq var və ona görə də gün ərzində nə qədər yorğun olsam da, saat fərqinə uyğunlaşa bilmək üçün ən azı 6:30-a qədər oyaq qalmalıyam. Gündə 2 dəfə intensiv məşq edirik. Bu aylarda yuxu ən yaxşı dostumuzdur. Biz Lənkərana basketbolu ən yaxşı formada gətirməyə hazırlaşırıq.

– Komandanın heyətini necə dəyərləndirirsiniz?
– İlk dəfə birlikdə oynamağımıza baxmayaraq, komanda kimi hərəkət edə bilirik. Komanda yoldaşlarım növbəti ötürməni qabaqcadan sezirlər ki, bu uğurlu olmaq üçün əsas nüanslardandır. Daha sonra necə olacağını zaman göstərəcək. Hal-hazırda bu komanda ilə olmaqdan zövq alıram.

– Azərbaycanda ilk ad gününüzü qeyd etdiniz. Təssüratlarınız necə oldu?
– Ad günləri mənim üçün heç vaxt bu qədər vacib olmamışdı. Həyat mənə hər günün nə qədər dəyərli olduğunu tez öyrətdi. Həyatda heç nəyin zəmanəti yoxdur. Portlend Universitetində 4 il beyzbol oynadım. 23 yaşım olanda NBA G liqasının sınaq imtahanına getdim. "Beykersfild Cəm"in məşqçisi və sahibi yanıma gəldi və mənə oynaya biləcəyimi, kifayət qədər istedadımın olduğunu dedi. Lakin əvvəlcə çox çalışmalı idim. Beləliklə, mənə Vaşinqton əyalətindəki kiçik kollecdən zəng gəldi və 2 il orada oldum. LCC-də 600-dən çox qələbə qazanmış 2 məşqçim və xaricdə oynayan biri mənə yaxşı müdafiə etməyi, eləcə də oyunu düzgün analiz etməyi öyrətdi. Ötürmələr həmişə mənə asan gəlirdi. Müdafiə və ribaundda olduğu kimi. Ötən il İsveçdə ən çox xal qazandığım mövsüm oldu. Dünyanın ən yaxşı bombardirlərini incələdim və öyrənməyə davam edirəm. Tanrıya şükürlər olsun ki, idmanla məşğul olmaq üçün mənə 2-ci şans verildi. Mən buna həmişə şükür edirəm.