"Sumqayıt" klubunun basketbolçusu Sadettin Donat yeni mövsümə hazırlıqları dəyərləndirib.

Prosport.Az xəbər verir ki, Azərbaycan mlllisində də çıxış edən 23 yaşlı basketbolçu qarşıya qoyulan məqsədlərdən danışıb.

O, komandanın yer aldığı B qrupunda 1-ci pilləni hədəflədiklərini söyləyib: “Azərbaycanda ilk mövsümümü keçirəcəyəm. Hazırda “Sumqayıt” məşqlərini davam etdirir. Taktiki məşğələlər keçirik, oyunçular bir-birini tanımağa çalışırlar. Baş məşqçimiz bizə çox kömək edir. Yeni komandayıq, hələ sıralarımıza qoşulanlar da olacaq. Fikrimcə, gündən-günə daha yaxşı olacağıq. Çempionatın startına qədər iki hazırlıq oyununda qüvvəmizi sınayacağıq. Hədəflərə gəlincə, öz qrupumuzda 1-ci yeri tutmaq və pley-offa vəsiqə qazanmaq istəyirik”.

Qeyd edək ki, Azərbaycan Basketbol Liqasında 2024/2025 mövsümünə oktyabrın 18-də start veriləcək.