Qadın basketbolçulardan ibarət Azərbaycan millisinin Avropa çempionatının seçmə mərhələsindəki oyun təqvimində dəyişikliklər olub.

Prosport.Az xəbər verir ki, Beynəlxalq Basketbol Federasiyasının yekun qərarına əsasən, noyabrın 7-də Bakıda Polşa yığmasını qəbul etməli olan millimiz bu görüşü rəqib meydanında – Sosnoveç şəhərində yerləşən “Arena Sosnoveç”də keçirəcək. Həmin qarşılaşmada Polşa seçməsi ev sahibi olacaq. Əvəzində isə növbəti il fevralın 9-da Polşa yığması Bakıda Azərbaycan millisinin qonağı olacaq.

Noyabrın 10-da Bakıda Litva millisi ilə keçirilməsi nəzərdə tutulan görüş də “Arena Sosnoveç”də oynanılacaq. Bu görüşdə millimiz nominal meydan sahibi sayılacaq.

Qeyd olunan dəyişikliklər noyabr ayında ölkəmizin Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransına (COP 29) ev sahibliyi etməsi ilə bağlıdır.