2023/24 mövsümündə Azərbaycan Basketbol Liqasında çıxış edən 3 klubumuz heyətini gücləndirib.

Prosport.Az xəbər verir ki, ötən mövsümün gümüş medalçıları olan "Naxçıvan" Azərbaycan milli komandasının üzvü Nəzər Quliyev və iranlı Ehsan Şabani ilə anlaşıb.
Hər iki basketbolçu 2.01 metr boya malikdir. Onlarla mövsümün sonuna qədər müqavilə imzalanıb. Həmçinin, Devon Cenkinslə müqavilə bağlanılıb. 29 yaşlı 2.04 metr boya malik oyunçu ötən mövsüm Çilinin II Divizionunda "Kolo Kolo" klubunun şərəfini qoruyub.

"Quba" isə ABŞ-li Kəmron Conzla anlaşıb. O, yeni komandası ilə mövsümün sonuna qədər müqavilə imzalayıb. 1999-cu il təvəllüdlü basketbolçu karyerası ərzində MakNis Dövlət Universiteti, Cəksonvill Dövlət Universiteti və Cənubi Karolina Dövlət Universiteti kimi kollec komandalarında oynayıb. "Quba" Conza qədər Malik Hant, Davonte Kreyven, Simeon Körklənd kimi legionerləri heyətinə qatıb.

"Abşeron" isə heyətini daha bir yerli basketbolçu ilə gücləndirib. Son 2 ildə U-16 milli komandasının (bu ildən U-18) üzvü olan İsmayıl Abdullayevlə 1 illik müqavilə imzalanıb. Qeyd edək ki, Abdullayev ötən mövsümün 2-ci yarısında "NTD-İndiqo"nun (hazırkı NTD) heyətində ölkə çempionatında çıxış edib.