Kişilər və qadınlardan ibarət millilərimiz Macarıstanın paytaxtı Budapeştdə təşkil olunan 45-ci Ümumdünya Şahmat Olimpiadasında bu gün növbəti görüşlərini keçirib.
Prosport.Az xəbər verir ki, X turda Kuba ilə üz-üzə gələn kişilərdən ibarət millimiz 3:1 hesablı qələbəyə sevinib. 14 xalı olan yığmamız 9 pillə irəliləyib. Hazırda millimiz 12-ci yerə yüksəlib. Son turda rəqib Braziliya olacaq.
Aydın Süleymanlı – Karlos Albornos 1:0
Nicat Abasov – Luis Kezada 0,5:0,5
Rauf Məmmədov – Dilan Berdayes 1:0
Məhəmməd Muradlı – Omar Almeyda 0,5:0,5
Eyni turda Monqolustanla münasibətlərə aydınlıq gətirən qadınlardan ibarət kollektiv isə 2,5:1,5 hesabı ilə qalib gəlib. 15 xalla 9-cu yerə yüksələn millimiz 3 pillə irəliləyib. Mixail Şereşevskinin kapitanı olan yığmamızın son turdakı rəqibi reytinq-favorit Hindistan millisi olacaq.
Günay Məmmədzadə – Turmunx Munxzul 0,5:0,5
Ülviyyə Fətəliyeva – Batxuyaq Munquntuul 1:0
Gövhər Beydullayeva – Davaademberel Nomin-Erdene 1:0
Xanım Balacayeva – Bat-Erdene Munqunzul 0:1
10:37
Azərbaycanın kişilərdən və qadınlardan ibarət milliləri Macarıstanın paytaxtı Budapeştdə təşkil olunan 45-ci Ümumdünya Şahmat Olimpiadasında bu gün növbəti görüşlərini keçirəcək.
Prosport.Az xəbər verir ki, kişilərdən ibarət kollektiv X turda Kuba ilə üz-üzə gələcək. Komanda hazırda 12 xalla 21-ci yerdədir. Hindistan 17 xalla lider mövqeyini qoruyub saxlayır. 15 xala malik ABŞ ilə Özbəkistan müvafiq olaraq 2-ci və 3-cü yerləri bölüşür.
Yığma daha əvvəl Monteneqro (3:1), İordaniya (3,5:0,5), Finlandiya (3,5:0,5), Moldova (3:1) və Qazaxıstanı (3:1) məğlub edib, Hindistan (1:3) ilə Litvaya (1,5:2,5) uduzub, İtaliya (2:2) və Yunanıstanla (2:2) isə heç-heçəyə razılaşıb.
Qadınlardan ibarət kollektiv X turda Monqolustanla münasibətlərə aydınlıq gətirəcək. Hazırda 13 xalı olan yığma 12-ci yerdə qərarlaşıb. Qazaxıstan 16 xalla liderdir. Hindistanın 15, Çinin isə 14 xalı var.
Yığma Sloveniya (3:1), Nikaraqua (4:0), Avstraliya (3:1), Vyetnam (2,5:1,5), İsveçrədən (4:0) üstün olub, Argentina, Ukrayna və İtaliya ilə heç-heçə edib – 2:2, Qazaxıstana isə yenilib – 1:3.