Azərbaycan Basketbol Liqasının (ABL) 2024/25-ci illər mövsümünün başlanma tarixi müəyyənləşib.

Prosport.Az xəbər verir ki, çempionat Müstəqillik Günündə – 18 oktyabr tarixində başlayacaq.

Ötən ildən fərqli olaraq, basketbol üzrə XXX Azərbaycan çempionatında 12 komanda çempionluq uğrunda mübarizə aparacaq. Bu mövsümdən etibarən, "Cəlilabad" klubu "Quba" ilə əvəzlənəcək, "Xəzri" "Naxçıvan" olaraq adlandırılacaq, "Xırdalan" isə "Abşeron" adı ilə fəaliyyət göstərəcək. Eyni zamanda yeni yaranmış "Ordu" və "Lənkəran" klubları da yeni mövsümdən çempionatda mübarizəyə qoşulacaq.

Yeni reqlamentə əsasən, çempionatın oyunları 4 dövrəli 20 turdan ibarət sistem üzrə keçiriləcək. Oyun zamanı meydançada 4 əcnəbi və mütləq şəkildə 1 yerli basketbolçunun iştirak etməsi əsas şərt olacaq. Müntəzəm mövsümün oyunları A və B qrupları üzərindən baş tutacaq.

Ötən çempionatın nəticələrinə əsasən, müntəzəm mövsümü ilk "6-lıq"da bitirmiş, yəni pley-offa vəsiqə qazanmış klublar A qrupunda, pley-offa vəsiqə qazana bilməmiş 4 klub və yeni yaranmış 2 klub B qrupunda mübarizə aparacaq.

A qrupu: "Sabah" BK, "Naxçıvan" BK, NTD Bakı, "Abşeron" BK, "Neftçi" İK, "Sərhədçi" PİK.

B qrupu: "Sumqayıt" BK, "Gəncə" BK, "Quba" BK, "Şəki" BK, "Ordu" İK, "Lənkəran" BK.

Müntəzəm mövsümdə A qrupunu ilk 3 sırada tamamlamış klublarla yanaşı, B qrupunu lider bitirmiş komanda pley-offun 1/4 final mərhələsinə vəsiqə qazanacaq. A və B qruplarında digər yerləri tutmuş komandalar isə pley-offun 1/8 final mərhələsində üz-üzə gələcək. 1/8 finalda ən tez 2 qələbə qazanmış klublar 1/4 finala vəsiqə qazanacaq. Həm 1/4 final, həm də yarımfinal seriyaları 2 qələbəyə qədər davam edəcək. Final seriyasında isə ən tez 4 qələbə qazanmış klub ABL çempionu olacaq.

Qeyd edək ki, klubların pley-off mərhələsində göstərdikləri uğurlu və ya uğursuz nəticələrə əsasən, növbəti mövsümdən hansı klubların A qrupunda, hansı klubların isə B qrupunda iştirak edəcəyi müəyyənləşəcək.