"Federasiyanın sonuncu İcraiyyə Komitəsinin iclasında bu barədə danışdıq. Hələlik, bizim xoşumuza gələn loqo olmayıb. Federasiya tərkibində bu işlə məşğul olan komissiyaya dedim ki, bir də baxsınlar. Açığı, bizə göndərilənlər arasında mənim xoşuma gələni yoxdur".

Bunu Prosport.Az-a Azərbaycan Şahmat Federasiyasının (AŞF) prezidenti Mahir Məmmədov deyib.

AŞF aprelin 18-də loqo elanı verib. Mayın 20-də verilən elanın vaxtı bitsə də, federasiyanın yeni loqosu dəyişilməyib.

Mahir Məmmədov bunun səbəbini xoşlarına gələn loqonun olmaması ilə əlaqələndirib: "Hətta işləri bəlli olan kənar dizayn şirkətlərə də müraciət etdik. Onlar da bizə düz-əməlli loqo təqdim edə bilmədi. Gənclər və İdman Nazirliyinin loqosu çox gözlənilməz və heyranedicidir, çox bəyənirəm. Onun kimi gözlənilməzi bizə təqdim edilmədi. Ona görə də 1-2 həftə də vaxt verəcəyik. Çox böyük ehtimalla, yenidən loqo elanı barədə müraciət ünvanladıq".

Qeyd edək ki, qalib loqonun müəllifinə 3 min manat mükafat təqdim ediləcək.

Səbuhi Musa