"Qarabağ"ın 16 yaşadək komandasının (U-16) İtaliyanın Neapol şəhərində "Blue Devils" Həvəskar İdman Assosiasiyası tərəfindən keçiriləcək turnirdə rəqibləri müəyyənləşib.

Prosport.Az-ın xəbərinə görə, Asif Əlizadənin baş məşqçisi olduğu komanda "Blue Devils Cup" turnirinin D qrupunda ancaq İtaliya klubları ilə qarşılaşacaq. Rəqiblər "Empoli", "Benevento", "Nuova Tor Tre Teste" və Montefusko Spinezi Futbol Məktəbi olacaq.

A qrupunda "Dinamo" (Xorvatiya), "Napoli", "Romulea", "Virtus Yunior Stabiya", "Sportinq Artsano", B qrupunda "Roma", "Domjale" (Sloveniya), "Karlin Muzane", "Blu Devils", "Sanseverineze" və C qrupunda "Fyorentina", "Komo 1907", "Paqaneze", "Levante Atsurro" və "Mikri" komandaları mübarizə aparacaq. Oyunların vaxtı hər taymı 25 dəqiqədən ibarət olmaqla 50 dəqiqə çəkəcək.

"Qarabağ"ın qrupdakı oyunlarının təqvimini Bakı vaxtı ilə təqdim edirik:

6 sentyabr
10:30 "Empoli" – "Qarabağ"
14:15 "Qarabağ" – "Benevento"
19:15 "Qarabağ" – "Montefusko Spinezi"

7 sentyabr
13:00 "Qarabağ" – "Tor Tre Teste"

Həmçinin 7 sentyabr axşam saatlarında hər qrupun ilk 2 yerini tutmuş komanda 1/4 final matçlarına çıxacaq. Bir gün sonra yarımfinal və final görüşləri keçiriləcək. Final Bakı vaxtı ilə saat 15:00-da "Stadio Arena Pikkolo"da baş tutacaq.