I Liqanın debütantı "Baku Sportinq" daha bir serbiyalı futbolçunu heyətinə qatmağa hazırlaşır.

Prosport.Az-ın məlumatına görə, bu, 30 yaşlı hücumameyilli mərkəz yarımmüdafiəçisi olan Marko Pavlovskidir. Makedon əsilli futbolçu danışıq aparmaq üçün artıq Bakıdadır.

Qeyd edək ki, ölkəsində OFK, "Vojdovats", Kiprdə "Apollon", Portuqaliyada "Portu" (B komandası), "Vırzin", Belçikada "Muskron-Peruvelz", Xorvatiyada RNK, Belarusda "Dinamo" (Minsk), Litvada "Riteryay", "Suuduva", Monteneqroda "Buduçnost" və Qazaxıstanda "Aksu" komandalarının şərəfini qorumuş Pavlovski aprelin 1-dən heç bir kluba məxsus deyil. O bir müddət öncə İndoneziyanın PSMS klubu ilə anlaşsa da, orada oynamayacağı dəqiqdir.

Marko Pavlovski 2013-cü ildə Litvada keçirilmiş 19 yaşadək komandaların Avropa çempionatında Serbiya millisi ilə qızıl medal qazanıb. 10 nömrə Serbiya millisinin kapitanı da olub. Həmin turnirin qrup mərhələsində isə sonradan gümüş mükafatçı olacaq Fransaya bərabərlik qolunu vurub. O həmçinin, 2014-cü ildə "Portu" ilə Portuqaliyanın, 2022-ci ildə "Suuduva" ilə Litvanın Super Kubokunu qazanıb.

Xatırladaq ki, "Baku Sportinq" daha əvvəl Luka Stevanoviç və Uroş Yemoviç adlı serbiyalı futbolçuları da heyətinə qatıb.