AFFA U-14 Liqasında 2023/2024-cü illər mövsümünə yekun vurulub.

Prosport.Az xəbər verir ki, Azərbaycan Cüdo Federasiyasının Təlim-Məşq Mərkəzində 3-cü yer uğrunda oyun, “ASCO Arena”da isə final görüşü keçirilib. Bürünc mükafat uğrunda matçda “Vətən İOEUGFMPHŞ” üzərində 2:1 hesablı qələbə qazanan “Qəbələ” komandası yarışı 3-cü sırada tamamlayıb.

Ardından final qarşılaşmasında “Sabah” və “Qarabağ” komandaları üz-üzə gəlib. Bu komandalardan Asif Əlizadənin baş məşqçisi olduğu "Qarabağ" martda Belarusun paytaxtı Minskdə keçirilmiş "Bizim gələcəyimiz" adlı turnirdə çempion olmuşdusa, Şahin Zeynalovun çalışdırdığı "Sabah" ötən ay Türkiyənin Antalya şəhərində təşkil olunmuş "Junior World Cup" turnirinin qalibi olmağı bacarmışdı. Tərəflərdən "Sabah" müntəzəm çempionatı 63 xalla 1-ci, "Qarabağ" isə 57 xalla 2-ci bitirmişdi. 

Oyuna "Sabah" yaxşı başlayıb. 24-cü dəqiqədə Xəzər Hüseynzadə hesabı açıb. Bununla belə, 2-ci hissənin əvvəlində "Qarabağ" geridönüş etməyi bacarıb. "Qarabağ"ın kapitanı Murad İsmayılov penaltidən hesabı bərabərləşdirib. Az sonra komandanın hücumçusu Daniil Rəcəbov başla fərqlənib. Beləliklə, çətin rəqibinə 2:1 hesabı ilə qalib gələn “Qarabağ” çempion olub.

Ən məhsuldar oyunçu “Şirvansaray”ın futbolçusu Qabil Kərimli olub. Mövsümün ən yaxşı oyunçusu adına isə “Qarabağ”ın üzvü Daniil Rəcəbov layiq görülüb.

Qeyd edək ki, daha əvvəl "Qarabağ"ın U-13 və U-15 komandaları da çempion olmağı bacarmışdı.