"Qarabağ"ın "Hədəf" qrupları AFFA-nın keçirdiyi liqalarda uğurlu çıxışını davam etdirir.

Prosport.Az-ın xəbərinə görə, Elşad Xudadatovun baş məşqçisi olduğu U-13 yarımfinalda "Vətən"lə qarşılaşıb. İlk oyunda "Qarabağ" 2:1 qalib gəlib. Hər iki qolu Həsən Mürşüdzadə vurub. Cavab oyunu isə "ASK Arena"nın 4-cü meydançasında keçirilib. Bu dəfə də "Qarabağ" 3:2 qalib gəlib. Səbran Muradlı, Həsən Mürşüdzadə və Hüseyn Novruzlu topu rəqib qapılarından keçirib. Bununla da "Qarabağ"ın U-13 komandası finala çıxıb. Finaldakı rəqib "Neftçi" PFK olacaq. Oyun iyunun 14-də "ASCO Arena"da keçiriləcək.

"Qarabağ"ın U-14 komandası isə 1/4 finalın ilk oyununda "Sumqayıt"la qarşılaşıb. Asif Əlizadənin yetirmələri 2:1 qalib gəlib. Cavidan Əlizadə və Əli Bəşirov fərqlənib. Cavab görüşü sabah saat 18:00-da "Sərhədçi" İdman Mərkəzinin stadionunda keçiriləcək.

Ağdam təmsilçisinin U-15 komandası isə 1/4 finalın ilk oyununda 10:2 qalib gəldiyi "Araz-Naxçıvan"ı cavab görüşündə də darmadağın edib – 9:2. Düzdür, rəqib 16-cı dəqiqədə hesabı 2:2 etməyi bacarsa da, sonda səviyyə fərqi öz sözünü deyib. "Qarabağ"dan Adəm Qafarov (2), Hüseyn Bayramov (5), Əli Zeynalzadə (24-penalti), Amin Rzayev (40+1), Murad İbrahimli (43, 57), Onur Əliyev (48), Riad Qaradağlı (51, 67), qonaqlardan Kənan Hüseynəliyev (14) və Yaqub Məmmədov (16) qolları vurub. Beləliklə, "Qarabağ" yarımfinala vəsiqə qazanıb. Yarımfinaldakı rəqib "Neftçi" PFK olacaq. İlk oyun iyunun 8-i saat 18:00-da "Neftçi"nin Bakıxanov qəsəbəsində yerləşən Futbol Mərkəzində baş tutacaq.