Bosniya və Herseqovinada keçirilən minifutbol üzrə Avropa çempionatında 1/8 final mərhələsinə start verilib.

Prosport.Az xəbər verir ki, Azərbaycan millisinin pley-off mərhələsindəki rəqibi Bolqarıstan yığması olub.

Oyuna yaxşı başlayan komandamız erkən qol vurub. Ramiz Çovdarov 7-ci dəqiqədə cərimə zərbəsindən fərqlənib. Ancaq ilk hissədə rəqib cərimə zərbəsindən hesabı bərabərləşdirməyi bacarıb – 1:1. 2-ci hissə isə millimizin üstünlüyü şəraitində keçib. Əvvəlcə Təmkin Xəlilzadə (30), daha sonra isə Rəvan Kərimovun (45) qolları ilə yığmamız 3:1 hesablı qələbə qazanıb.

Qeyd edək ki, Azərbaycan millisi 1/4 finalda Sloveniyaya 1:0 qalib gəlmiş Qazaxıstan seçməsi ilə qarşılaşacaq.

10:50

Azərbaycanın minifutbol millisi Bosniya və Herseqovinanın paytaxtı Sarayevoda keçirilən Avropa çempionatında bu gün 1/8 final matçına çıxacaq.

Prosport.Az xəbər verir ki, millimiz Bolqarıstanla qarşılaşacaq.

Matçın start fiti saat 19:30-da səsləndiriləcək.

Qeyd edək ki, yığma qrup mərhələsində keçirdiyi bütün matçlarda qələbə qazanıb. Komanda Belçikanı 3:0, İtaliyanı 2:1, Fransanı isə 3:1 hesabı ilə məğlub edərək 1/8 finala maksimum nəticə ilə yüksəlib. Bolqarıstan isə Gürcüstan, Serbiya və Portuqaliya ilə mübarizə apardığı E qrupunda 6 xalla ikinci olub.

Milli qələbə qazanacağı təqdirdə, 1/4 finalda Qazaxıstan – Sloveniya matçının qalibi ilə üz-üzə gələcək.