AFFA U-15 Liqasında ilk mərhələ başa çatıb.

Prosport.Az-ın xəbərinə görə, paytaxt zonasında lider "Qarabağ" sonuncu – XXX turda ilk dövrədə öz meydanında 1:3 hesabı ilə uduzmuş "Sumqayıt"la qarşılaşıb.

"Köhlən atlar" çətinliklə də olsa, rəqibindən revanşı almağı bacarıb – 3:2. Sumqayıt şəhərindəki "Kapital Bank Arena"da keçirilən qarşılaşmada hesabı meydan sahibləri açıb. Kamal Zülfiyev 12-ci dəqiqədə fərqlənib. İlk hissə "Sumqayıt"ın 1:0 üstünlüyü ilə başa çatıb.

2-ci hissədə gənclik şəhəri təmsilçisinin futbolçusu Tunar Nəbizadə 44-cü dəqiqədə öz qapısına qol vurub. Avtoqolda fasilədən sonra meydana çıxmış "Qarabağ"ın sol cinah yarımmüdafiəçisi Hüseyn Bayramovun ötürməsi də rol oynayıb. 72-ci dəqiqədə Onur Əliyev "köhlən atlar"ı hesabda önə keçirib. Oyunun sonları dramatik keçib. Kamal Zülfiyev 80-ci dəqiqədə dubl edərək hesabı bərabərləşdirib. Lakin "Qarabağ"ın hücumçusu Murad İbrahimli hakim Elməddin İskəndərovun oyuna əlavə etdiyi dəqiqədə (80+3) qələbə qolunu vurmağa müvəffəq olub.

Bununla da "Qarabağ" (78), "Sabah" (74), "Sumqayıt" (67), "Neftçi" (59), "Zirə" (55), "Qəbələ" (53), "Turan Tovuz" (52) pley-off mərhələsinə vəsiqə qazanıb. "Səbail", EFA, "Lion", "Kəpəz", ASTA, İCBFA, "Araz Saatlı" və "Ulduz Mingəçevir" yarışla vidalaşıb. Yuxarıda qeyd etdiyimiz 7 komanda və Naxçıvan Muxtar Respublikasının qalibi "Araz-Naxçıvan" ev-səfər prinsipi ilə pley-off oynayacaq. Pley-off mərhələsinin püşkü bu gün atılacaq.