AFFA U-15 Liqasında liderlik mübarizəsi baş tutub.

Prosport.Az-ın xəbərinə görə, lider "Qarabağ" XXIX turda ən yaxın izləyicisi "Sabah"la qarşılaşıb. Tərəflər bir tur öncə rəqiblərini darmadağın etmişdi. "Qarabağ" "Lion"u Binə qəsəbə stadionunda 7:0, "Sabah" isə öz meydanında "Ulduz"u (Mingəçevir) 15:0 məğlubiyyətə uğratmışdı.

Görüşdə meydan sahibi "Qarabağ" olsa da, tərəflərin razılığına əsasən oyun "Sabah"ın ev qarşılaşmalarını keçirdiyi "ASK Arena"nın əsas meydançasında baş tutub. "Qarabağ" bu görüşdə 2:1 qalib gəlib. 

Baxmayaraq ki, hesabı nominal qonaq komanda açıb. Bütün qollar ilk hissədə vurulub. Nihad Cəfərzadə 6-cı dəqiqədə "Sabah"ı önə keçirib. 17-ci dəqiqədə Murad İbrahimli hesabı bərabərləşdirib. Bundan 3 dəqiqə sonra isə "köhlən atlar"ın kapitanı Uğur Qurbanlı qələbə topunu vurub. "Qarabağ"ın qapıçısı Bilal Hacıyev isə 40+3-cü dəqiqədə Samir Şərifovun penalti zərbəsini dəf edib.

Xatırladaq ki, tərəflərin dekabrın 2-də "ASK Arena"nın 4-cü meydançasında baş tutmuş ilk görüşündə də "Qarabağ" qalib gəlmişdi – 2:0.

Qeyd edək ki, sonuncu – XXX turun nəticəsindən asılı olmayaraq, "Qarabağ"ın çempionatı 1-ci yerdə başa vurması rəsmiləşib. Vüqar Əsgərlinin baş məşqçisi olduğu komanda 75 xalla liderdir. "Sabah" isə 71 xalda qalıb.