"Qarabağ" klubunun 20 yaşlı qolkiperi Amin Ramazanovun Prosport.Az saytına müsahibəsi.

– İkinci dəfə çempionluq sevinci yaşayırsınız?
– Bəli, 2-ci dəfə bu sevinci yaşadım. Çempionluq kubokunu qazanmaq həmişə xoşdur. Demək olar ki, biz hər dəfə hədəfimizə çatırdıq.

– Bu il daha rəqabətli çempionat oldu?
– Bəli, düşünürəm ki, bu mövsüm çempionatın səviyyəsi xeyli qalxıb. "Sabah" çox artırdı. "Neftçi" də yaxşı oynadı.

– Bu mövsüm neçə oyun keçirdiniz?
– Premyer Liqada bu mövsüm 6, ya 7 oyun keçirdim.

– "Qarabağ" ilə neçə illik müqaviləniz qalıb?
– 2 illik.

– Mövqeyinizdə 2 milli üzvü olan qapıçı ilə rəqabət aparırsınız. Bu çətin deyil sizin üçün?
– Xeyr, mən hər gün onlardan nəsə öyrənməyə çalışıram. Onlar hər zaman mənə kömək edirlər.

– Milliyətcə haralısınız?
– Haralı olduğum sualına cavab verməyəcəyəm. Moskvada doğulduğumu deyə bilərəm.