"Qarabağ"ın "Hədəf" qrupları olan U-14 və U-15 komandaları növbəti qələbələrini qazanıb.

Prosport.Az-ın xəbərinə görə, Asif Əlizadənin baş məşqçisi olduğu "Qarabağ" öz meydanında XXIII tur çərçivəsində "Sumqayıt"ı qəbul edib.

Ötən ay Belarusun paytaxtı Minskdə keçirilmiş "Bizim gələcəyimiz" adlı turnirin qalibi olmuş "köhlən atlar" Paytaxt zonasında 3-cü sırada olan rəqibini böyük hesabla – 3:0 məğlub edib. Qolları Məhəmməd Məmmədov və Minsk turnirinin bombardiri Daniil Rəcəbov (2) vurub. Xatırladaq ki, bu komanda ötən tur "Səbail"i də eyni hesabla məğlub etmişdi.

Vüqar Əsgərlinin çalışdırdığı U-15 isə Şağan Olimpiya Kompleksinin stadionunda "Zirə"nin qonağı olub. Murad İbrahimli (41) və komandanın bombardiri Əli Bəşirovun (73) qolları komandaya 2:0 qələbə qazandırıb. 66 xalla çempionatda lider olan komanda ilk dövrədə noyabrın 11-də keçirilmiş matçda da "Zirə"yə bu hesabla qalib gəlmişdi. Ağdam təmsilçisinin U-15-i növbəti turda ASTA-nı (Azerbaijan Sport Talents Academy) qəbul edəcək.