“Emin Mahmudov “Neftçi”də qalsa, Azərbaycanda ən çox maaş alan 3 futbolçudan biri olacaq”.

Prosport.Az xəbər verir ki, bunu “Neftçi”nin prezidenti Kamran Quliyev jurnalistlərə açıqlamasında deyib.

Klub rəhbəri müqavilə müddəti iyunun sonuna qədər olan kapitan Emin Mahmudova yüksək məbləğdə məvacib təklif etdiklərini gizlətməyib.

O, yekun qərarın Azərbaycan Kubokunun final görüşündən sonra veriləcəyini söyləyib: “Azərbaycan futbolçuları ölkə çempionatında pik səviyyəyə çatandan sonra düşünməyə başlayırlar. Emin Mahmudov da heç bir qərar verməyib. Onunla 3-4 gün əvvəl şəxsən söhbətim olub. Kubokun final oyunundan sonra birlikdə oturub qərar verəcəyik. Söhbət təkcə maddiyyatdan getmir. Təklifimiz çox yaxşıdır, digər illərlə müqayisədə rəqəmlər yüksəkdir”.

Kamran Quliyev yarımmüdafiəçinin legioner həyatı yaşamaq ehtimalını da istisna etməyib: “Emin Azərbaycanda yalnız "Neftçi"də oynayacaq. Xaricə getməli olsa, özü üçün yeni macəra axtaracaq. Ancaq hələ qərar verməyib”.