“Qarabağ”ın 13 yaşadək futbolçulardan ibarət komandası (U-13) Belarusda keçirilən beynəlxalq turnirdə mübarizəyə qələbə ilə başlayıb. 

Prosport.Az xəbər verir ki, Elşad Xudadatovun baş məşqçisi olduğu U-13 Minskdə təşkil olunan “Bizim gələcəyimiz” turnirinin ilk turunda Rusiyanın "Sovetski rayon" (Moskva) komandası ilə görüşüb.

A qrupunda yer alan komandamız bu qarşılaşmada 2:1 hesabı ilə qalib gəlib. "Qarabağ"ın ilk qolunu oyunun 21-ci dəqiqəsində İbrahim Rza, 2-ci qolu 38-ci dəqiqədə penaltidən Raul Hüseynli vurub.

"Qarabağ" qrupdakı digər matçda Belarusun Yuri Puntus Futbol Məktəbi (Minsk) komandası ilə qarşılaşıb. “Köhlən atlar” rəqibinin qapısından 2 cavabsız qol keçirib. "Qarabağ"ın əsas komandasının kapitanı olan Maksim Medvedevin oğlu Miroslav Medvedev 21-ci dəqiqədə hesabı açıb. Künc zərbəsindən sonra fərqlənən futbolçu qol sevincini Kriştianu Ronaldu kimi qeyd edib. 31-ci dəqiqədə isə dirəkdən dönən topu Fərid İsrafilli rəqib qapısına yol tapıb. Bununla da Ağdam təmsilçisi növbəti mərhələyə vəsiqəni əldə edib.

Qeyd edək ki, komandamız qrupdakı son matçında Rusiya təmsilçisi Kalininqrad ilə qarşılaşacaq. Bu görüş qrupda lider olmaq üçün vacib matç olacaq. Sabah keçiriləcək matç Bakı vaxtı ilə saat 16:45-də keçiriləcək.