Sports.az saytı bir neçə nominasiya üzrə 2022/2023 futbol mövsümünün ən yaxşılarını mükafatlandırıb.

Prosport.Az xəbər verir ki, mövsümün ən yaxşı futbolçusu “Neftçi”nin kapitanı Emin Mahmudov seçilib. 31 yaşlı yarımmüdafiəçi səsvermə zamanı “Qarabağ”ın hücumçusu Ramil Şeydayev və “Sabah”ın ukraynalı legioneri Aleksey Kaşşuku cüzi fərqlə qabaqlayıb.

“Qarabağ”a növbəti dəfə Premyer Liqa çempionluğunu qazandıran Qurban Qurbanov ən yaxşı baş məşqçi nominasiyasının qalibi olub. Sorğuda iştirak edənlər yalnız bu nominasiyada yekdilliklə eyni namizədə səs veriblər.

“Sabah”ın və Azərbaycan millisinin gənc üzvü Yusif İmanov ən yaxşı qapıçı seçilib. Mövsümü 21 qolla tamamlayan “Qarabağ”ın hücumçusu Musa Qurbanlı isə ən yaxşı gənc futbolçu mükafatına yiyələnib. O, xaricdə olduğu üçün mükafat adaşı və əmisi Musa Qurbanlıya təqdim olunub.

Bundan başqa, FIFA referisi Əliyar Ağayev ən yaxşı hakim, “Qarabağ”ın direktoru Əmrah Çəlikəl isə ən yaxşı klub funksioneri seçiliblər.

Həmçinin, "Turan Tovuz"un sponsoru olan "Huner Group"un rəhbəri Ehtiram Quliyev bölgə futbolunun inkişafındakı xidmətlərinə, “Sabah” klubunun rəsmisi İqor Ponomaryov uşaq futbolunun inkişafındakı roluna görə təltif ediliblər.

Mövsümün ən böyük tərəqqiyə nail olmuş klubu isə Premyer Liqaya vəsiqə qazanan “Araz Naxçıvan” seçilib. Mükafat baş məşqçi Azər Bağırova təqdim olunub.