"Azarkeşlərimizi, futbolçuları, rəhbərliyi təbrik edirəm. Mühüm oyun idi. "Araz-Naxçıvan" da, biz də yuxarıdan qopmaq istəmirdik. Stresli matç idi. Bəlkə də bu stres hücumda kəsərli olmağımıza mane olurdu. İlk hissədə rəqib yaxşı müdafiə olunurdu. Bir az çətinlik çəkirdik. 2-ci hissədə dəyişikliklər etdik. Sona qədər öz şansımızı gözləyib tələsməmək lazım idi. Bu gün bunu gördüm. III dövrə bitir. İtkilərimiz, zədələrimiz var. Bəzi oyunçular hazır deyil. Bunların da təsiri olur".

Prosport.Az xəbər verir ki, bu sözləri "Turan Tovuz"un baş məşqçisi Ayxan Abbasov Premyer Liqanın XXVI turunun “Araz-Naxçıvan"la matçından (2:0) sonra keçirilmiş mətbuat konfransında deyib. O daha sonra jurnalistlərin suallarını cavablandırıb.

– Bu mövsüm "Araz-Naxçıvan"a xal verməmisiniz. Bu, rəqibi daha yaxşı təhlil etməyinizlə bağlıdır?
– Belə şeylər olur. Bizim də qalib gələ bilmədiyimiz komandalar var. Konkret bir səbəb deyə bilmərəm. Amma buna görə sevinirəm. 

– Düşünürdünüz ki, Aleks Souza sonradan oyuna girsə, daha çox fayfa verə bilər?
– Aleks tam hazır deyil, zədəsi var idi. Ötən oyunda da risk etdik. Bu gün Xəyal Nəcəfov da zədədən sonra oynadı. Özünü yaxşı göstərdi.